TSELATRA

Ramatoa iray tao anaty taxi-be no nezahin’ny mpanendaka nosintomina ny firavaka teny aminy, tetsy Anosibe, omaly. Tsy nahazo na inona na inona ilay olon-dratsy satria nanano sarotra ny nisintomany io firavaka io. Efa narahin’ny iray tamin’ireo mpandeha taxi-be maso rahateo io mpanao sinto-mahery io talohan’ny nikasany hanao ny fandrobana.
Lasa lavenona ny entana tao amin’ny tokantrano iray niharan’ny fahamaizana tetsy Ambohimanarina, omaly tamin’ny 1 ora sy sasany maraina. Nalaky tonga ny mpamonjy voina nifehy ny afo sy nifanome tanana tamin’ireo lasibatra.
Fatin-dehilahy nivoaka fotsifotsy teo amin’ny vavany, hitan’ny fokonolona tao Antarandolo, fianarantsoa, omaly. Mpanosika kalesa no asa fiveloman’io lehilahy io. Miroso amin’ny fanadihadiana ny mpitandro filaminana ao an-toerana.