TSELATRA

Vehivavy iray naratra nianjera avy eny ambony kamiaobe iray, nandritra ny fampielezan-kevitra an’ny kandidà iray teny Andoharanofotsy, omaly. Nihinjakinjaka teo ambonin’ilay fiarabe izy kanjo tratran’ny fihonjonana tampoka ny fiara teny am-pandehanana. Nianjera avy eny ambony fiara izy. Folaka ny tongony ka nentina haingana namonjy toeram-pitsaboana. Nitohy kosa ny fampielezan-kevitra na teo aza izany.
Naratra voakapa famaky teo amin’ny tarehiny ny zandary mpiana-draharaha iray nandritra ny fifandonana tamin’ny dahalo tao Ambovondramanesy, distrikan’i Maha­janga II, ny sabotsy teo. Nanao fanarahan-dia ireo dahalo ny zandary niaraka tamin’ny fokonolona ka niafara tamin’ ny fifandonana izany. Dahalo iray maty tao anatin’io fifandonana io. Nisy tamin’ireo dahalo no naratra fa nentin’ny namany nitsoaka.
Mirongatra ny fanendahana eo Analakely, amin’ izao ankatoky ny fetin’ny Krismasy izao. Renim-piana­kaviana iray nendahin’ny tontakely teo am-pividianana legioma teo an-tsena. Notatahin’ireo olon-dratsy ny poketrany ka lasan’ireo mpangalatra ny vola niaraka tamin’ny finday. Nitsoaka any anaty pavillon ireo jiolahy.
Naratra mafy ny renim-pianakaviana iray nendahin’ny jiolahy teo Anosy, omaly atoandro. Misy lehilahy manakorintsana fanalahidy mody manontany raha handeha moto. Roa lahy ry zalahy ka ny iray mody manontany raha nisintona ny poketrany kosa ny iray. Nianjera tamin’ny arabe izy ka naratra teo amin’ny lohany.