Mbola mitohy ny fandripahana ala any Ambatondrazaka. Tsy handefitra mihitsy anefa ny fanjakana ary tsy maintsy hampiharina ny sazy farany henjana.
Hazo sarobidy voamboana miisa 31 sy hazoala miisa 26 indray no tra-tehaky ny fitantanam-paritry ny Tontolo iainana sy ny fampandrosoana maharitra (Dredd) Alaotra Mangoro, tany Andrebakely Avaratra, Ambatondrazaka, faritra Alaotra Mangoro, ny fiandohan’ny taona 2025 teo. Tratra tao amin’ny tranon’ olon-tsotra iray ireo hazo tsy ara-dalàna ireo.
Marihina fa zary fahitan’ny olona maro ny fisian’ny fitaterana hazo tsy ara-dalàna, entina amin’ny bisikileta am-polony, mahazaka hazo efatra tsirairay any Ambatondrazaka. Araka ny filazan’ny mponina, tsy nety nitonona anarana, anisan’ny mandalo ao amin’ny fokontany Mangalaza, kaominina Feramanga, ireo olona mitatitra hazo isa-maraina amin’ny bisikileta ireo, ary tonga ao an-tampon-tanànan’Ambatondrazaka vao maraimbe. Voalaza fa avy any amin’ny ala atsinanan’Ambatondrazaka any ny hazo taterin’izy ireo.
Ankoatra izany, tsiahivina fa vao tsy ela akory, ny 27 desambra teo, nahatraran’ny zandarimariam-pirenena any Toamasina, kamiao miisa telo nitatitra voamboana miisa 341 sy hazoala miisa 264 tany Antaratasy Ivoloina. Voarohirohy tamin’ity raharaha ity ny zandary miisa 3 sy sivily 9, ary naiditra am-ponja voanjimaika.
Tsy handeferana
Manoloana izao tranga izao, nanamafy ny minisitry ny Tontolo iainana sy ny fampandrosoana maharitra, Andonirina Max Fontaine, fa tsy handeferana mihitsy ny fandripahana sy ny fitaterana antsokosoko na fanaovana trafika ny harena voajanahary. Tafiditra ao anatin’izany koa ny fandoroana ala. Hampiharina avy hatrany ny sazy farany henjana ho an’ireo izay voamarina fa meloka.
Manentana hatrany ny fanjakana, hiantso maimaimpoana amin’ny laharana maitso 955 hiantsoan’izay mahita na mahatsikaritra fitrandrahana na fitaterana antsokosoko ny harena voajanahary.
Njaka Andriantefiarinesy
French