TSELATRA

Vehivavy iray nendahin’ny jiolahy teny Ambo­hi­jatovo, omaly hariva. Teo am-pilaharana hijery jiro izy no nosintonin’ireo mpanendaka ny poketra teny aminy. Nian­jera tamin’ny arabe izy vokatry ny sinto-mahery nahazo azy. Finday sy vola no tao anaty poketra. Ranomaso sisa ny azy satria tsy afaka nijery jiro intsony.
Dahalo mpangalatra omby lavon’ny tifitry ny polisy tao Bekotrobaky, fokontany Ambotaky, kaominina Besa­lampy, afakomaly tamin’ny 9 ora maraina. Nangalatra omby tao Betognitony ny dahalo roa lahy. Nentin’izy ireo nando­sitra ny omby fito. Nanara-dia ny fokonolona sy ny mpitandro filaminana. Raikitra ny fifandonana ka lavo ny iray tamin’ireo olon-dratsy. Tafaverina amin’ny tompony ny omby.
Zazarano iray hita faty novonoina tamin’ny fomba feno habibiana tao Bazarikely Toamasina, omaly maraina. Nofatorana tady ny tendany mialoha ny nanariana azy tao anaty bozaka. Vao latsaka mihitsy ity zazakely ity no novonoin’ireo nahavanon-doza. Tsy fantatra kosa hatreto ny ray aman-dreny tompon’antoka tamin’izao vononoan’olona izao.
Naratra ny raim-pianakaviana iray voatsatoka antsy teny amin’ny lalamby Ampefiloha, omaly vao maraina. Andeha hiantsena eny Anosibe izy no nifanehatra tamin’ny jiolahy telo nitondra antsy. Lasan’ireo olon-dratsy ny vola 2 hetsy Ar saika hividianana entana. Nitsoaka ireo jiolahy rehefa nahazo ny vola teny aminy.