TSELATRA

Lehilahy iray voasambotry ny fokonolona ka nalain’ny mpitandro filaminana hatao famotorana rehefa nikasa hanolan-jaza tao amin’ny fokontany Ampatana, kaominina Antsirabe, omaly. Zazavavy 6 taona nokasainy hanaovana ny filan-dratsiny saingy nisy nahatsikaritra.
Jiolahy roa lahy nanambana basy nandroba moto nentina renim-pianakaviana iray tao Toamasina, omaly. Voasakana, nalain’ireo olon-dratsy an-keriny teny amin’io tompony io ilay moto.
Niharan’ny dinabe fa nandratra ankizy mitovy aminy tsy nahy ny zazalahy iray tao amin’ny kaominina Beheloky, distrikan’i Toliara II, afakomaly. Efa nandoa 1 tapitrisa Ar, mbola takin’ny fianakavian’ny lasibatra omby miisa 15 noho ny dinabe misy ao an-toerana io zazalahy nandratra io ka velon-taraina ny ray aman-dreniny.
Lehilahy hita faty teo amoron-drano tao Manambondro, distrika Vangaindrano, afakomaly. Nahitana mangana ny tendany ka ahina ho nokendainy izy talohan’ny namoizany ny ainy. Nesorin’ireo tsy mataho-tody koa ny voamason’io olona hita faty io.