Sary hosodoko : Asa tanana mitondra anjara biriky amin’ny sehatry ny fanabeazana

Kolontsaina iray anisan’ny manana ny anjara toerany eo amin’ny sehatry ny fanabeazana ny hafatra entin’ny sa­ry hosodoko. An­tony iray mahatonga ny mpanao asa tanana manao iza­ny ary ny fanjifan’ ny olona azy ireny.

Manabe sy mitaiza toe-po sy toe-panahy ho an’ny olon-drehetra ny haikanto, anisan’izany, ny hafatra entin’ny sary hosodoko. “Miezaka ny hanaovana azy ireny ho lasa maodely eny anivon’ny fiarahamonina sy ny tokantrano ary ny firenena iray manontolo mihitsy”, hoy i Zo Nasandratra, mpanao hosodoko, raha nanaovana fanadihadiana. Nilaza izy fa tokony hita taratra amin’ny zavakanto atao sy amin’ny alalan’ny haikanto ataon’ny mpanakanto ny fanabeazana entiny. Raha ho azy manokana, manao ireo karazana sary hosodoko samihafa izy. Ampisehoany fa manavanana azy ny fahaizana mifandray amin’ny olon-drehetra ary miaina amin’ny toerana rehetra koa izy. Miezaka miala kosa amin’ireo zavatra ratsy sy miiba kosa ny tenany izay tsy mitarika fandrosoana. Ankoa­tra izay, misy zavatra tian’ny mpanakanto aseho avokoa ny sary rehetra. Na ny “art pejorative” izany na ny “art abstrait”. Samy maka ny tandrify azy ny tsirairay. Satria, tsy mitovy fitiavana ny olon-drehetra ka antony ma­hatonga azy hampifangaro ireo karazana sary ireo. Tan­jona ny hamaliana ny filan’ny mpanjifa sy ny hamelona ny fanaovana sary eto amin’ny Nosy.
Sehatra iray ahafahan’ny mpanakanto sy ny mpanjifa mifandray ny sary hosodoko, amin’ny ankapobeny. Tokony iezaka, araka izany, ny mpanakanto mampiseho ny hafatra rehetra amin’ny alalan’ny zavakanto ataony. Ankoatra izay, afaka maminavina sy mampifandray ary mampifanojo ny eritreritra eo amin’ny sary sy ilay mpijery ihany koa izany.

Nolovaina sy nampiana
fianarana ny fanaovana sary hosodoko
Ravonison Andrianjaka Zo Nasandratra, raim-pianakaviana, mpanao sary hosodoko eto Antananarivo. Fantatry ny maro amin’ny hoe Zo Nasandratr’art eo amin’ny sehatry ny kanto. Nanomboka nampiranty ny asa tanany voalohany teto Madagasikara izy tamin’ny taona 2001. Niarahany tamin’ny mpanakanto maro samihafa eto an-toerana izany. Tsy nijanona niseho mihitsy izy nanomboka teo fa niezaka nampiseho sy nampahafantatra izany tamin’ny olon-drehetra. Hatra­min’ izao, mbola misehatra amin’ny fanaovana izany asa tanana izany izy ary mandray anjara amin’ny hetsika maro.

Asa nolovaina tamin’ny rainy
Efa mpanao asa tanana teo amin’ny tontolon’ny fanaovana sary hosodoko ny rainy, raha ny fanazavany. Noho izany, azo lazaina fa asa nolovainy avy amin’ny rainy ny fanaovana asa tanana ka mora ho azy ny nanao sy nanatanteraka izany. Ankoa­tra izay, nanara-maso sy nanampy azy betsaka ny rainy satria nianatra manokana momba ny sary. “Teraka tao anatin’ny fanaovana sary satria efa mpanao sary ny ray aman-dreniko dia lehibe tao anatin’izay aho”, hoy i Zo Nasandratra. Tsy nihonona tamin’izany anefa fa nampiana fianarana hatrany izany mba hanamafy ny traikefa sy hanatsarana ny asa tanana izay atao, raha ny nambarany hatrany. Tsy nijanona nisehatra sy nilomano tamin’ny fanaovana sary hatrany izy na dia nandranto fianarana hafa tamin’ny ambaratonga ambony aza, raha ny nambarany. Manampy betsaka hivoatra ny fizarana sy fitomboan’ny traikefa amin’ny fanaovana ny asa. Mampitombo fahaizana sy mampivelatra hatrany ny fikarohana.

Asa fivelomana sady fiainana

Asa fivelomana no sady fiainana ny fanaovana ny sary hosodoko, raha ho azy manokana. Tsy voafaritra mazava ny vola miditra amin’ny mpanao azy satria miovaova araka ny vanim-potoana sy ny fandehanan’ny tsena izany, raha ny fanazavana. Nilaza izy fa rehefa miezaka mifandray aman’olona dia mitombo, araka izay, ihany koa ny vola miditra. Manjifa ny vokatra avokoa ny sokajin’olona rehetra na Malagasy na vahiny. Amin’ny ankapobeny, tena mahasarika ny mpanjifa ny vokatra mampiseho sarin’olona (portrait). Anisan’ny manamarika ny fiainan’ny olona tsirairay ny fahitana ireny karazan-tsary ireny. Haigam-panahy mandrisika azy hanao ny asa ny fifantohana. “Tsy mila misotro na mihinana na mandray zavatra na mihaino mozika fa mahavita asa foana rehefa mifantoka”, hoy hatrany izy.

Ampiasaina ny akora fototra rehetra
Mampiasa ny akora fototra rehetra ity mpanakanto sy mpanao asa tanana ity rehefa manao sary. Ampiasainy avokoa rehefa azo amoahana sary. Miainga hatrany amin’ny pensily hazo tsotra indrindra. Toy ny pensily antsoina hoe « inactinique », ny pensily «aniline », « bicolore », « crayon aquarellable», « crayon pastel », « crayon fusain », « crayon sanguine », « crayon de charpentier » sy ny maro hafa.

Nanatontosa : Mino