Hiroso amin’ny fitokonana faobe ny mpiasan’ny Jirama. Araka ny loharanom-baovao, takin’izy ireo ny handraisan’ny fanjakana fepetra amin’ny tale jeneraly sy ny tale miisa telo akaiky azy. Antony, leo ny mpiasa satria mangataka fanemorana foana ireo mpitantana rehefa hangatahana fihaonana. Raisin’izy ireo ho tsy fahaiza-mitantana izany, toy ny tsy fisian’ny rafi-pitantanana ao amin’ny Jirama. Misy ny tomponandraikitra efa nitana toerana iray nandritra ny roa taona, nefa tsy misy ny fanamafisana izany amin’ny alalan’ny taratasy, izay tsy mifanaraka amin’ny lalàna mifehy ny asa. Eo koa ny tsy fanajana ny zon’ny mpiasa satria tsy aloa ny vidim-panafody ho an’ny mpiasa sy ny efa misotro ronono. Voatery ny mpiasa no mandoa azy avy any am-paosiny, nefa ela be vao honerana.
Voalaza koa fa tsy manaraka ny lalàna mifehy ny asa ny tambim-bola manokana (indemnité spécifique), sady tsy hajaina ny Fifanarahana iombonana. Hamoronana antontan-taratasy fitoriana mba hanagadrana ny mpiasa sasany, alefa any amin’ny zandarimaria, polisy, Bianco, Pac, …. Miha ratsy ny kalitaon’ny tolotra omen’ny Jirama ny mpanjifa. Lazaina fa misy ny famatsiam-bola nefa toa fampandriana adrisa fotsiny, hita amin’izao delestazy sy fahatapahan-drano manerana ny Nosy izao. Miantraika any amin’ny kalitaon’ny tolotra koa ny tsy fandoavana ny volan’ireo mpamatsy akora ny Jirama.
Njaka A.
French