« Efa ela loatra… ». Nosafidiana manokana ho lohahevitry ny fankalazana ny faha-45 taona nilomanosan’ny Olombelo Ricky tao anatin’ny mozika io. Nihaona indray tamin’ny mpanao gazety izy sy ny mpikarakara, omaly, tetsy amn’ny Ny havana 67 Ha. « Samy hahazo ny anjarany ny mpankafy tsirairay, tao anatin’izay fotoana lavalava izay », hoy ny fampanantenany mahakasika indrindra ilay fampisehoana izay hotontosaina ny alahady 6 avrily ho avy izao, etsy amin’ny Lapan’ ny kolontsaina sy ny fanatanjahantena Mahamasina.
Hotetezina avokoa, araka izany, ireo rakikira miisa 12 efa navoakan’ny tarika Olombelo Ricky. Manomboka any amin-dry « Ikalangita », « Taratra Hazavana », « Amorom-parihy », « Iray lalana », « Kopakopa-tanana », mandalo ny « Ny Havana », « Odiaina », « Eo anilanao », « Izy indrindra » ka hatraty amin’ireo hira nivoaka faramparany. Ora 4 eo no hiarahana amin’ny mpankafy amin’izay anjoria an-kira izay.
Efa roa taona mialoha izao no nikaondoha hanatanteraka ity seho ity ny tarika sy ny Louvto Company. Nisesisesy ny fihaonana hanamasahana azy, ka dingana farany sisa mialoha ny tena seho. Nisesy toy izany koa ny famerenana ho an’ny tarika olombelo Ricky, izay ahitana an’i Mendrika (amponga maroanaka), Titi ( zavamaneno tsofina), Rivokely (vata maroafitsoka), Njaka (gitara beso), Jaleky (angorodao), Miaro Tanjona (zavamaneno ravaka) ary i Dina Voakaly (feo).
Zo ny Aina
French