Nilatsaham-baratra ka nahafatesana olona telo tao amina tokantrano iray ao Ampandrambe, fokontany Ambararatasarotra, distrikan’ Ambatofinandrahana, ny 12 janoary teo. Tamin’ny 02 ora sy sasany tolakandro, samy tao an-trano ireto fianakaviana ireto. Nipoaka tampoka ny varatra. Efa tafiditra tao an-trano anefa izany ka nirehitra ny tafo. May nandritra io ny lehilahy iray 20 taona. Voa an’ilay varatra koa ny zaza roa 10 taona sy 12 taona. Iray tampo avokoa izy telo mirahalahy maty ireto. Marihina fa tao amin’ny efitrano avaratra avokoa ireo maty ireo. Ankoatra azy telo mirahalahy niara-maty, ankizy vavy iray 11 taona zanak’olona hafa niaraka tamin’izy ireo tao koa namoy ny ainy. Tetsy ankilany, nakanaka aina tao amin’ny efitra atsimon’ilay trano ny renin’izy telo lahy voalaza etsy ambony ka afa-doza. Tapitra potika ireo entana tao an-trano noho ny firehetana. Efa nalevina avokoa ny vata-mangatsiakan’izy efatra mianadahy noho ny fahapotehany vokatry ny afo.
Tsiferana R.
French