Hosokafana amin’ny fomba ofisialy amin’ity volana mey ity ny masoivohon’i Madagasikara any Emirats Arabo. Hiara-dalana amin’izany koa ilay hetsika « Dubaï Business Forum » tanterahina any amin’ity firenena ity. Hanomboka ny 27 hatramin’ny 29 mey izao izany ka anisan’ny mpandray anjara amin’izany i Madagasikara, araka ny tapaka nandritra ny filankevitry ny minisitra afakomaly. Hitarika ny delegasionina amin’izany ny filoha Rajoelina Andry. Anisan’ny tanjon’ity fihaonambe ity ny hampiroborobo ny fiaraha-miasa ara-toekarena sy ara-barotra eo amin’i Madagasikara sy ny Emirats Arabo Mitambatra. Tafiditra ao anatin’
izany ny fanasongadinana ny fahafahana mampiasa vola amin’ny sehatra lehibe. Ohatra amin’izany ny sehatry ny fotodrafitrasa, ny fambolena, ny angovo ary ny teknolojia.
Tsiahivina fa efa niatrika ny fihaonana an-tampony «Sommet mondial des gouvernements» natao tany Dubaï, ny filoha Rajoelina Andry, ny 12 hatramin’ny 14 febroary lasa teo.
Nisongadina tamin’izany ny fanomezan-danja ny fampiasana ny haitao ara-kajy mirindra « Digitalisation » sy ny fampiroboroboana ny diplaomasia eo amin’ny sehatry ny toekarena mba hisian’ny fisokafana sy ny fampivelarana ny fifandraisana.
Anisan’ireo filoham-pirenena sy lehiben’ny governemanta miisa fito niatrika izany ny filoha Rajoelina Andry.
Efa tany Emirats Arabo Mitambatra ny filoha ny volana septambra 2024. Niompana tamin’ny fifandraisana eo amin’ny sehatry ny fitaterana ana habakabaka indray ny foto-diany tamin’izany ka nidiran’ny kaompania Emirats hiasa eto amintsika.
Synèse R.
French