“Manimba firenena ny adihevitra tafahoatra”, hoy ny filohan’ny Fiombonan’ny firaisamonina sivily ho amin’ny fandrosoan’ny Malagasy na ny Coalition de la société civile pour le progrès des Malagasy (CSCPM), Rakotomanana Richardson, teny Antaninarenina, omaly, manoloana ny tsy fiatoan’ny adihevitra momba ny fanapoizinana amin’ny sakafo tato ho ato. Toetsika Malagasy ny fitiavana adihevitra. Ifandroritana ny trangan-javatra iray dia lasa miteraka savorovoro goavana be eo amin’ny fiarahamonina. Raha ny fanapoizinana amin’ny sakafo teny Ambohimalaza, lasa niitatra tany Mahajanga, Toamasina, Ambositra… Fanitaran-dresaka amin-javatra mety manakorontana ny fiarahamonina izany. Manimba toekarena izay satria fiveloman’ny olona. Raha roa na telo tapitrisa, ohatra, no mivarotra hani-masaka, lasa tsy mandeha avokoa ny tsenan’ny olona. Eo koa ny fanimbana fiainan’olona manokana.
Toy ny hoe mahafinaritra ny Malagasy ny mihaino radio an-dalambe. Ny tsahotsaho no heverina ho marina, fa ny radio ofisialy na ny vaovao marina indray no tsy inoana. Tokony hialana izany toe-tsaina izany: ny fitiavana adihevitra tafahoatra loatra. Iadin-kevitra avokoa ny zava-drehetra, dia mankany amin’ny tsy izy. Nefa ny adihevitra mahariva andro. Misy koa adihevitra tsy hihinanan-kanina. Adihevitra mahasoa no tokony hamenoana ny haino aman-jery eto amin’ny firenena. Raha adihevitra no hamanoana ny fiainam-pirenena iray manontolo, eto isika no horaisina : hiady an-trano eto no hiafarany. Fifanakalozan-kevitra no tokony hatao.
R. Nd.
French