“Hanamafy ny Repoblika ary hampiroborobo ny fiaraha-miasa sy ny fifampidinihana eo amin’ny samy mpiara-miom-bon’antoka amin’ny fiainam-bahoaka ny fananganana Filankevitra ara-toekarena sy sosialy ary kolontsaina (CES C)”. Io ny fanambaran’ny fiarahamonina sivily, toy ny Hetsika Rohy, Fivmpama, WWF, sns, tamin’ny fihaonana teny Ambatonakanga, ny faran’ny herinandro teo. Naneho ny traikefan’ny Filankevitra ara-toekarena sy sosialy ary tontolo iainana (CESE) tamin’ny fihaonana ny solontena avy any Nouvelle-Calédonie, i Jonas Tein. Ho an’i Madagasikara, rafi-pivoriana fahatelo nofaritan’ny Lalàmpanorenana aorian’ny Antenimierampirenena sy ny Antenimierandoholona ny CESC. Hitondra anjara biriky amin’ny fahamarinan-toerana eto amin’ny firenena. Hampiroboroboana koa ny fahafahan’ireo mpandray anjara amin’ny fiovana lehibe eo amin’ny fitondrana tsara tantana, ny fanjakana tan-dalàna sy ny fangaraharana ary ny fandraisana andraikitra eo amin’ny fiarahamonina.
Noho izany, zava-dehibe ny fananganana azy. Eo ny amin’ny tamberin’andraikitra amin’ny vahoaka sy ny fandraisan’anjaran’ny olom-pirenena ary ny maha zava-dehibe ny fifampiresahana sy fifampidinihana eo amin’ny samy mpiara-miombon’antoka: sampandraharaham-panjakana, sehatra tsy miankina, fiarahamonina sivily, sendikà. Anisan’ny sahanin’ny CESC ny fampahafantarana ny politikam-panjakana, ny fampiroboroboana ny fifanakalozan-kevitra ara-tsosialy sy ny fitadiavana marimaritra iraisana takina, ny fandraisana anjara amin’ny fanombanana ny fahombiazan’ny politikam-panjakana, ny fandraisana ny solontenam-paritra izay mifandray tsy tapaka amin’ny CESC rezionaly.
R. Nd.
French