PAM-CUA ary BNGRC: Manamafy ny fahaizana sy ny fahavononana amin’ny vonjy taitra

Mampihena ny takaitra ny fananana fahaizana mamolavola izay miantoka ny fahavononana rehefa misy voina. Ilaina koa ny fanaovana fanazaran-tena.

Tanterahina mandritra ny roa andro, eny Anko­rondrano, nifarana oma­ly, ny atrikasa fanamafisana ny fahaizana mamolavola sy miantoka ny fahavononana amin’ny vonjy taitra. Ny fandrindrana momba ny fanazaran-tena araka ny fomba fiasa izay iarahan’ny Pam sy ny kao­minina Antananarivo Re­nivohitra ary ny BNGRC miasa no atao amin’izany. Mandray anjara ireo mpiantsehatra maro avy amin’ny fanjakana sy avy amin’ireo mpiara-miombon’antoka maro. Ma­maly ny fitakiana avy amin’ireo manampahefana misahana ny fitantanana voina ao amin’ny vondrona Sadc ny tetikasa momba ny fiomanana an-tanàn-dehibe izay mikendry ny hanamafy ny fahaiza-miatrika vonjy taitra amin’ny alalan’ny fanaovana fanazaran-tena famerenana toe-javatra.

Ahafahan’ny mpandray anjara nasionaly sy ny mpiara-miombon’antoka rehetra ma­m­pihatra ary manamafy ny fahaiza-manaony amin’ny fa­maliana ny vonjy taitra an-tanàn-dehibe ny fanazaran-tena natao. Amin’ny alalan’ny fanazaran-tena amin’ny loza an-tanàn-dehibe no hanamafisana ny fiaraha-miasa eo amin’ny sampandraharaham-panjakana, hanomezana famaliana haingana, mahomby ary voarindra tsara anatin’ny hamehana.
Tanjon’ny atrikasa ny hitondra vokatra azo tsapain-tanana sy voarafitra miaraka izay hametraka fototra ho an’ny fanazaran-tena feno fahombiazana. Misy ny dingana fiomanana mankany amin’ny fampiharana ny fanazaran-tena araka ny fomba fiasa. Eo koa ny fampivondronana ireo mpandray anjara fototra avy amin’ny governemanta sy ny sehatra tsy miankina amin’ny fanjakana. Manampy ireo ny fampifanarahana ny fanazaran-tena amin’ny toe-javatra misy eto an-toerana sy ny fampiharana ary fifanakalozan-kevitra amin’ny alalan’ny asam-bondrona.

Vonjy