Mahomby ny fiaraha-miasan’ny sehatra tsy miankina sy ny oniversite miankina amin’ny fanjakana amin’ny famolavolana tanora ho matihanina amin’ny saripika sy ny sarimihetsika. Malaza ivelan’ny Nosy ny sanganasa vitan’ireo mpianatra.
Manamafy ny fiaraha-miasa natomboka ny taona 2017 no ho mankaty ny orinasa Ymagoo sy ny sekoly ambony Ecole de management et d’innovation technologique (Emit) ao anatin’ny oniversiten’i Fianarantsoa. Noraiketina an-tsoratra ary natao sonia omaly, teny Fenomanana Mahazoarivo, ny fanohizana ny fiaraha-miasa eo amin’ny roa tonta. Manana mention information, communication et multimedia ny Emit ka mampianatra ny L2 sy ny L3 momba ny fifehezana ny saripika sy ny sarimihetsika ny mpampianatra matihanina avy ao amin’ny Ymagoo. “Mampiavaka ny fiaraha-miasa koa ny fandraisana ny mpianatra hianatra asa eo anivon’ny orinasa rehefa vita ny taom-pianarana isan-taona”, hoy ny mpitantana ny orinasa Ymagoo, Andriantsoa Masy. Tanjona ny fanandratana ny tanora sy ny fampianarana ho matihanina amin’ny saripika sy ny sarimihetsika ary ny fikirakirana drônes.
Ankoatra ny fampianarana eny anivon’ny Emit ao Fianarantsoa, Ihosy ary Taolagnaro, hanokatra sampam-panofanana ho an’ny olona efa miasa te hanamafy ny fahaiza-manao ny roa tonta ka ny mpampiofana avy ao amin’ny Ymagoo no hisahana izany ao anatin’ny sekoly ambony ihany. Atao anaty efitrano sy ampitain-davitra ny fizarana ny fahalalana ary ahazoana mari-piofanana, araka ny fanazavan’ny talen’ny Emit, profesora Rakotonirainy Hasina.
Mamiratra ny mpianatra mivoaka avy ao amin’ny mention information, communication et multimedia satria nandrombaka ny laharana voalohany tamin’ny fifaninanana iraisam-pirenena tamin’ny famokarana hononantsary momba ny kolontsaina sinoa. Hananan’ny olona fitokisana koa ny mpianatra ka voaasa matetika any Chine hamokatra horonantsary.
Vonjy
French