Nandray fanapahan-kevitra ho amin’ny fandaminana ny tanàna ny kaominina Antananarivo Renivohitra. Nanomboka tamin’ity hereinandro ity, voarara ny fiantsonan’ ny fiara eo amin’ny lalana Naka Rabemanantsoa, manomboka eo amin’ny auto-école Cedric, hatreo amin’ny Immeuble Santa. Tsy voakasik’izany kosa ny fiaran’ireo mponina manodidina sy nahazo alalana manokana. Handraisana fepetra ny ankoatra izay.
Voarara ihany koa ny fivarotana hani-masaka, tsakitsaky sy zava-pisotro ankalamanjana amin’io ampahan-dalana voalaza io. Tsy azo atao koa ny fisotroana eny an-dalambe, fa manelingelina ny filaminana amin’ny alina, manoloana ireo fivarotana zava-pisotro mandra-maraina.
Na izany aza, hisy toerana manokana hofaritana hifindran’ireo mpiantsona sy mpanjifa, manaraka ny lalana Menalamba, manomboka amin’ ny 8 ora alina ka hatramin’ny 4 ora maraina.
Tanjona ny hisian’ny filaminana, ny fahadiovan’ny tanàna ary ny fanajana ny fiaraha-monina sy hanatsarana ny fifamoivoizana eny Behoririka sy Antanimena.
Efa nanomboka nanatona, niresaka ary nanentana teny an-toerana ny CUA, tamin’ny alalan’ny polisy monisipaly, tamin’ity herinandro ity.
Mampahatsiahy hatrany ny CUA fa voararan’ny lalàna ny fisotroana toaka eny an-dalambe sy eny amin’ny toerana ho an’ny daholobe
Tatiana A
French