Anisan’ireo nahazo fanofanana arakasa avy amin’ny minisiteran’ny Fampianarana teknika sy fanofanana arakasa ny voafonja ao amin’ny fonjan’Antalaha. Nomena mari-piofanana ireo nahavita izany.
Any Sambava, faritra Sava, ny minisitry ny Fampianarana teknika sy ny fanofanana arakasa, Rasoloarisoa Marie Marcelline, ao anatin’ny fandaharanasa ho fanatsarana sy fanamafisana ny sehatry ny fanofanana arakasa manerana ny faritra. Nandray azy ireo solontenam-panjakana any an-toerana. Manamarika ny finiavan’ny minisitera hanakaiky hatrany ny tanora sy ny mpiofana eny ifotony ny fitsidihana. Sady hanohana ny fanatsarana ny fiofanana, ny fotodrafitrasa ary ny tetikasa samihafa ho an’ny fampandrosoana maharitra ihany koa. Nandritra ny fitsidihany any an-toerana, nisy ny lanonana fanomezana mari-piofanana ho an’ireo voafonja nahavita fiofanana arakasa tao Antalaha, izay natrehin’ny minisitra.
Hitondra fidiram-bola ny fiofanana…
Ity hetsika ity dia tsy mijanona ho fankatoavana fotsiny fa manamarika dingana vaovao eo amin’ny fiainan’ireo voafonja ihany koa. Satria manome azy ireo fitaovana sy fahaiza-manao ahafahany manangana fiainana vaovao, mivelona amim-pahamendrehana ary mandray anjara amin’ny fampandrosoana rehefa tafaverina eny anivon’ny fiarahamonina. Anisan’ny tanjon’ny minisitera ny hanome fiofanana ireo voafonja, hahafahan’izy ireo miatrika ny fiverenana eny anivon’ny fiarahamonina rehefa vita ny saziny. Efa maro ireo voafonja nisitraka fampiofanana tahaka izao avy amin’ny minisitera sy ny mpiray ombon’antoka. Anisan’ny taranja efa niofanan’izy ireny ny fanaovana mofomamy, ny fanaovana taovolo sy ny fikojakojana tarehy ary ny fanjairana salaka hampiasain’ny vehivavy rehefa tonga fadimbolana (fiofanana efa nataon’ireo voafonja tany amin’ny faritra hafa).
Vonjy
French