Nisongadina taorian’ny fanadihadiana natao fa maro ny zatovovavy miala an-daharana any an-tsekoly. “Mahatratra 5 000 izany ho an’ny distrikan’i Vondrozo manokana”, hoy ny talem-paritry ny Fanabeazam-pirenena ho an’ny faritra Atsimo Atsinanana, Rafalimanana Ruffin Angelo. Ho fanarenana izany, misy ny hetsika iarahana miasa amin’ny minisitera maromaro: Fanabeazana, Rano, Fahasalamam-bahoaka, Fampianarana teknika, Tanora, ho fampahaleovantena ny zatovovavy. Omena ireto farany ny fahalalana sy ny fahaiza-manao ahafanany mamolavola vinam-piainana aorian’ny fiofanana azony. Tanterahina amin’ny kaominina 18, anatin’ny distrikan’i Vondrozo, ny tetikasa ary mahasahana zatovovavy niala an-tsekoly 5 154 ary ankizivavy mpianatra 1 600, tohanan’ny Unicef.
Ho an’ny efatra andro, zatovovavy 100 niala an-daharana sy mpianatra 100 hafa no misitraka fifampizarana amin’ ny sehatra efatra miavaka. Ampianarina hahafantatra ny tenany sy ny talentany izy hitondra azy amin’ny sehatrasa mifanaraka amin’ny tanjony. Omena fahalalana koa izy ireo momba ny fahadiovana mandritra ny fadim-bolana ary ny fisorohana ny vohoka aloha loatra. Mampiavaka ny hetsika koa ny tafa mivantana amin’ny vehivavy fakan-tahaka valo izay samy efa mahaleo tena ara-pivelomana na teo aza ny sedra samihafa nolalovan’izy ireo.
Vonjy
French