Miisa 24 ny olona maty nandritry ny fandalovan’ny rivodoza CHENESO teto amin’ny nosy. Mahatratra 21 ireo tsy hita popoka nandritra izany raha ny tatitra navoakan’ny BNGRC omaly. Maherin’ny 73 377 ireo tra-boina manerana ny nosy. Mitsinjara ao anatin’ ny faritra 15 ireo traboina miisa 16 688. Mahatratra 35 677 ireo olona tsy maintsy nafindra toerana vonjimaika. Vokatry ny fiakaran’ny rano sy fahasimban’ ny trano fonenany. Ka mitsinjara amin’ny toerana samihafa miisa 135 ireo tra-boina miisa 7904.
Maherin’ny 23 630 ireo fotodrafitr’asa simba manerana ny nosy. Anisan’ izany ireo voly vary ato anatin’ny faritra Analamanga, Analanjirofo, Boeny ary Sofia. Maherin’ny 60 ireo sekoly potika sy rava ao anatin’ny faritra maro manerana ny nosy. Anisan’ izany ny eto amin’ny faritra Analamanga. Misy ny fianarana natao andraisana ny tra-boina toy ny EPP sy ny CEG. Mbola miato arak’ izany ny fampianarana mba hitsinjovana sy ho hiarovana ireo mpianatra tsy ho voan’ny loza.
Ankoatr’izany, miampy ny tetezana sy ny lalana tapaka manerana ny nosy. Antony, ny fihotsahan’ny ampahan-dalana eo amin’ ny lalam-pirenena samihafa. Izay miteraka fikorontanana sy fihatoan’ny fitaterana ho an’ny mpitatitra. Toy ny ao amin’ny lalam-pirenena fahaefatra sy faha enina. Marihina fa lasan’ny rano ny ampahan- dalana amin’izy ireny ka mahatonga ny fahatapahana.
Mbola ho betsaka ny rotsak’orana entin’ny rivodoza CHENESO eto Madagasikara. Mitondra takaitra noho izany ireo faritra iva sy manakaiky fefiloha toy ny eny Ampitatafika. Efa miakatra ny renirano ary vaky ny fefiloha eny an-toerana. Efa mandray andraikitra ny fanjakana sy ireo tompon’andraikitra isan-tsokajiny manoloana ny tranga.
Mino ( mpianatra asa)
French