Herinandro fahatelo amin’ ny savorovoro miseho eto an-dRenivohitra izao, misedra olana ny fampianarana, indrindra ho an’ireo sekoly manakaiky ny toerana misy ny fihetsiketsehana. Efa niverina tapak’andro ny fandraisana ny mpianatra ny herinandro lasa teo, araka ny lamina niarahan’ ny mpanabe sy ny mpitantana sy sekoly ary ny ray aman-dreny. Tsy misy olana ireo monina manodidina ny toeram-pianarana fa ireo mody lavitra mampiasa ny taxi-be no sahirana amin’ny hariva.
Ireo any amin’ny ambaratonga fototra (EPP) nahazo filazana amin’ny fampiatoana ny fampianarana ato anatin’ny Cisco Antananarivo Renivohitra, tsy mbola nanohy ny asa aloha hatramin’ny omaly. “Miandry filazana mazava avy amin’ny minisiteran’ny Fanabeazam-pirenena izahay tale vao hanokatra ny varavaran’ ny sekoly”, hoy ny tale iray. Tsy maintsy hisy fiantraikany amin’ny fandaharam-pianarana ny fanapahana nandritra ny tapa-bolana fa anjaran’ny tale sy ny mpanabe no mametraka lamina hanatrarana ny banga rehefa miverina amin’ ny laoniny ny asa.
Isorohana ny fodiana hariva, ora iray (hisakafoan’ny kilonga any an-tsekoly) ihany no miato ny fampianaraan isan’andro ka mirava amin’ny 3 ora ny mpianatra ho an’ny sekoly tsy miankina sasany. Ampitondraina sakafo ny ankizy vokatr’izay.
Vonjy
French