Mbola maro ireo Lycée tsy mandray mpianatra fa manakatom-baravarana noho ny fitokonan’ny mpampianatra. Tsy mbola nisy nivaly ny fitakiana ka tsy manaiky ny hiverina hampianatra izy ireo. Etsy andaniny, ny minisiteran’ny Fanabeazam-pirenena dia efa manentana ny mpampianatra hiverina an-tsekoly handray ny asany fa hamaha miandalana ny olana. Ankilany, ireo mpianatra manao fitakiana fa efa te hianatra satria lava loatra ny fotoana tsy nianarana.
Noraisin’ny minisitry ny Fanabeazam-pirenena ireo mpianatra avy ao amin’ny Lycée Jean Joseph Rabearivelo, omaly, nilaza ny hetahetan’izy ireo ny hiverina an-tsekoly amin’izay.
Tamin’izany no nilazan’ny minisitra fa tsy miankina amin’ny minisiteran’ny Fanabeazam-pirenena irery intsony ny fitakian’ny mpampianatra fa miankina amin’ny minisitera hafa. Efa tafiditra ao anaty lalàna mifehy ny tetibolam-panjakana 2026 ary miandry fankatoavana avy amin’ny solombavambahoaka izany.
Mihenjan-droa, araka izany, ny tady eo amin’ny mpampianatra sy ny fanjakana. Lasibatra kosa ny mpianatra manoloana ny vahaolana mitarazoka.
Ireo mpampianatra moa mangataka fifanarahana mazava sy voarakitra an-tsoratra ho porofon’ny fifanekena satria efa milaza ho fay tamin’ny zava-nisy tany aloha.
Tatiana A
French