Nahazo didy avy amin’ny fitsarana heloka bevava ao Fianarantsoa hisazy asa an-terivozona mandra-pahafaty ireo roa lahy namono nahafaty an’i Miley kely, omaly. Voasambotra ny 17 novambra 2024 lasa teo ny olona miisa telo voarohirohy ho tompon’ antoka tamin’io vonoan’olona mahatsiravina, tao atsimon’ny Lysea Raherivelo Ramamonjy, ao Fianarantsoa, io. Nifampitadiavan’ny fianakaviany io zazavavy vao 7 taona monja, atao hoe Miley, io tamin’izany fotoana. Novonoin’ireo tsy mataho-tody anefa izy. Nafatratr’izy ireo tao anaty gonin-tsaribao. Mangana ny ankamaroan’ny faritra saro-pady tamin’ilay zaza. Voamarin’ny mpitsabo fa niharan’ny herisetra tanteraka ny lasibatra. Niroso tamin’ny fitoriana izay noheveriny ho nahavanon-doza ny fianakavian’ity farany. Nanao ny fanadihadiana ny mpitandro filaminana. Vokany, olona telo voasambotra avy hatrany, herinandro vitsy taorian’ny nahitana ny vatana mangatsiakan’i Miley. Nentina teo anatrehan’ny fampanoavana ireo olona ireo. Voatazona vonjimaika am-ponja ka nalefa teny Tsiafahy ny roa. Nivoaka ny didim-pitsarana ary izao miafara amin’ny fanagadrana azy ireo mandra-pahafaty izao.
Tsiferana R.
French