Notanterahina tany Maorisy, ny 7 sy 8 novambra lasa teo, ny fampisehoana sy fifampizarana nataon’ny fikambanana Traceur Gasy, eo amin’ny taranja Parkour. Fampisehoana mitondra ny lohateny hoe “Fahazavana” no nentin’izy ireo, nahitana an’i Faliniaina Antonio, Ranaivomanana Serge ary Ranaivomanana Toky. Tamin’ny alalan’ny “Théâtre physique” sy “poésie urbaine” no nanehoan’izy telo lahy ny fampisehoana, nampisongadinana an’i Madagasikara. Nambaran’i Faliniaina Antonio fa zava-dehibe ny namoronana ity seho ity niaraka tamin’ireo namany mba hahafahana mitantara amin’ny alalan’ny zavakanto sy fihetsika ny zava-misy iainan’ny tanora eto Madagasikara. «Ny fampisehoana Fahazavana izay mampiseho ny fanantenana andrandrain’ny tanora manoloana ny haizina misy», hoy hatrany ny fanazavany. Mariky ny fandrosoan’ny Traceur Gasy sy ny taranja Parkour malagasy amin’ny sehatra iraisam-pirenena ihany koa ity seho natao tatsy Maorisy ity. Nanampy ireto tanora ireto tamin’ny famolavolana ity seho ity ny teknisiana, i Grandjean Thibeau, sy ireo artista maro tany an-toerana.
Mi.Raz
French