Notontosaina omaly, tetsy amin’ny Sooatel 67 Ha, ny lanonana fanolorana fankasitrahana an’ireo mpilalao tsipy kanetibe, izay nitondra avo ny ekipam-pirenena malagasy tamin’ny fiadiana ny ho tompondaka maneran-tany. Teo koa ireo mpilalao nahazo vokatra tsara tamin’ny fifaninanam-pirenena. Fantatra, nandritra io lanonana io, fa handeha hilaravinahitra any ivelany, any Frantsa, ry Yves sy Zigle. Ao amin’ny klioba Decines izy mirahalahy no hilalao raha ny fanadihadiana natao. Maharitra efa-taona eo ny fifanarahan’ny klioba amin’izy roa lahy ireto. Efa eo am-pikarakarana ilay taratasy handehanana any ivelany izy ireo, ankehitriny. Ankoatra izay, nambaran’ny filohan’ny Federasionina ny FSBM, omaly, fa iantohan’izy ireo ny fandehanan’ny Malagasy mpilalao any Mauritanie, firenena mandray ny fiadiana ny ho tompondakan’i Afrika, ny 23 hatramin’ny 28 novambra ho avy izao. Ny ekipan’ny Pac Ampitatafika, ahitana an-dry Balôty sy Saholy ary Mamy Ronaldinho no hiaro ny voninahi-pirenena mandritra io fifanintsanana io. Marihina fa nanolotra vola 39 tapitrisa Ariary ho an’ireo Malagasy mpilalao sy ny staff nitondra avo ny voninahi-pirenena tany ivelany tamin’ity, ny orinasa Yas Madagascar.
Fitia Randria
French