Hita faty nafenina tao ambany fandriana, tetsy Andoharanofotsy, ny lehilahy iray afakomaly. Ahina ny vadiny niara-monina taminy ka karohin’ny zandary fatratra.
Nitrangana vono olona mahatsiravina tao amin’ ny fokontany Beomby, Andoharanofotsy, afakomaly maraina. Hita faty nafenina tany ambany fandriana, tao amin’ny rihana faharoa, ny lehilahy iray, 31 taona. Nahitana dian’antsy maro ny lohany, nisy pempo ihany koa teo ambany masony. Tsy nahitàna ratra hafa kosa ny vatany. Miara-miaina amin’ny vadiny, 36 taona, antsoina hoe: Fanjasoanilaina Marie Odette, izy io. Nitsoaka niaraka tamin’ny zanany vavy 9 taona iray izy, taorian’ny loza ary tsy hita ny misy azy amin’ izao fotoana. Anisan’ny voarohirohy ho nanao ny vono olona mahatsiravina izy io ka karohin’ny mpitandro filaminana fatratra. Iangaviana izay mahita azy mba hampandre ny mpitandro filaminana akaiky azy indrindra.
Mifamaly matetika
Mifamaly sy miady matetika izy mivady ireo satria nampirafy ralehilahy. Mandefa vola amin’ny vehivavy sakaizany izy ary tratran’ny vadiny niantso tamin’ny finday. Efa intelo nandamina izany ny fianakaviana ary nilamina ihany taorian’izay. Tsy nisy nanampo an’izao vono olona izao anefa ny rehetra. Mbola nifamaly izy mivady ora vitsy talohan’io tranga io ary niezaka nandamina izany ny tompon-trano, raha ny fanazavana voaray. Niverina nijery azy ireo ny tompon-trano afaka kelikely saingy trano efa nihoson-dra no hitany. Ravehivavy irery no hitany tao anaty trano nikorontana tanteraka. Rehefa nanontanian’ny tompon-trano ity farany, nilaza fa efa nalefany any amin’ny hopitaly ilay rangahy vadiny.
Naka horonan-tsary sy nanadihady ny zava-misy ny tompon-trano. Natao ny fikarohana ny efitrano rehetra. Kanjo hita nafenina tao ambany fandriana ny vatana mangatsiakan’ilay rangahy. Nandositra avy hatrany anefa ilay ramatoa taorian’izay ary tsy hitan’ny tompon-trano ny nitsoahany. Efa manokatra
ny raharaha ny zandary avy amin’ny zana-tobim-paritra Andoharanofotsy.
Mino
French