Natokana ho an’ny rehetra vonona hitondra anjara biriky amin’ny fampandrosoana ny firenena sy ny fiainam-piangonana ny fikaonandoham-pirenena kristianina.
Hanomboka anio ary haharitra hateloana ny fikaonandoham-pirenena kristianina voalohany eto Madagasikara, hotanterahina eny amin’ny ISTS Mandrimena Iavoloha. Tafiditra amin’ ny fanamarihana ny faha-190 taonan’ny Baiboly ny hetsika. Misahana ny fanomanana izany ny Fikambanana mampiely Baiboly eto Madagasikara. Nambaran’izy ireo fa hanehoana ny anjara andraikitry ny kristianina manoloana ny seha-piainana folo izany. Hifampidinihina mandritra ny fivoriana ny sehatra rehetra, ka handraisana fehin-kevitra, araka ny fanazavan’ny solontenan’ny Fikambanana mampiely Baiboly malagasy, Rabenifara Désiré. Zavatra telo no hangatahina havoakan’ny mpivory. Voalohany, ahoana no iainan’ny tsirairay ny seha-piainana folo ka hampisongadina ny zava-misy tena iainana? Faharoa ny ambaran’ ny Soratra Masina mahakasika ny seha-piainana tsirairay. Fahatelo, ahoana ny fomba hanatanterahana izany amin’ ny fiainana manokana sy amin’ ny fiainan’ny fiangonana, fianakaviana? Havadika ho hetsika hiteraka vokatra tsara araka ny sitrapon’Andriamanitra ho an’ny tsirairay ireo avy eo.
Tamin’ny voalohan’ny taona no efa nanomana ity hetsika fikaonandoha ity ny mpikarakara. Resy lahatra izy ireo manoloana ny zava-misy lalovan’ny firenena ankehitriny. Mila izany ny vanim-potoana iainan’ny firenena amin’izao fotoana izao, satria manan-kambara amin’izany Andriamanitra.
Anisan’ny seha-piainana horesahina mandritra izany koa ny tontolo iainana ka hovelabelarina ao ny ambaran’ ny Soratra Masina momba izany sy ny baikon’Andriamanitra amin’ny hanjakan’ny olombelona amin’ny zavaboahary. Hazavaina ao koa ny mahakasika ny vokovoko maitso sy ny anjara andraikitry ny kristianina sy ireo mpitarika fiangonana amin’ny fiarovana ny tontolo iainana, araka ny fanazavan’ny Dr Rakotoson.
Lalaina.
Vonjy
French