Tontosa ny alakamisy 30 oktobra hatramin’ny sabotsy 1 novambra lasa teo, tany Antsirabe, ny andiany fahadimy amin’ny “Orange kilonga M’kanety”, taranja tsipy kanetibe. Fifaninanana ho an’ny sokajy 17 taona no ho midina (U17), zazalahy, nokarakarain’ ny Orange Madagascar sy ny Place de la pétanque Ampefiloha. Nandrombaka ny amboara i Brayan sy i Michael, mpilalaon’i Betafo, nandresy an’i Stefa sy i Fafa avy any Boeny, tamin’ny isa 13 no ho 9. Notoloran’ny mpikarakara amboara sy kanetibe ny voalohany, raha finday kosa ny faharoa. Nisy koa ny fifaninanana mitifitra “tir de précision” ka nandresy tamin’izany i Tsito, avy any Atsimo Andrefana.
Nahatratra 32 ny isan’ireo ekipa nandray anjara avy amin’ ny faritra folo. Nahitana an’ Analamanga, Vakinankaratra, Betafo, Atsimo Andrefana, Menabe, Boeny, Atsinanana, Itasy, Matsiatra Ambony ary Ihosy. Tanjona ny hanomezana sehatra ireo mpilalao manerana ny Nosy. Hanomanana ny mpilalao mpandimby, hita fa manana ny fahaiza-manaony, ny hetsika tahaka izao. Tsy azo odian-tsy hita mantsy ireny zava-bitan’ny sokajy zandriny, nandritra ny fiadiana ny ho tompondaka maneran-tany, natao tany Espagne, ireny. Nanampy tamin’ny fanatontosana ny Federasionina malagasy (FSBM), ny ligin’i Vakinankaratra, ny Homeopharma sy ny Eteria ary ny Kefir. Nanome ny loka kosa ny Orange Madagascar.
Tompondaka
French