Resabe tao amin’ny tambajotran-tserasera, nanomboka ny alarobia lasa teo, ny tsy nahafahan’ilay Malagasy mpikatroka, Razafindrakoto Mirantsoa, nihazo an’i Egypte. Hiatrika ny fiadiana ny ho tompondaka maneran-tany, izay tokony nanomboka omaly, ny anton-dia saika halehany tany an-toerana. Nitondra fanazavana ny Federasionin’ny Karate-do malagasy.
“Izaho filohan’ny Federasionina no malahelo voalohany rehefa misy atleta tsy lasa toy izao”, hoy ny filohan’ny FKM, Ratefinanahary Émile, raha nitondra fanazavana izy, omaly. Efa nanomboka tamin’ny volana janoary 2025, hoy izy, no nanomana ny atleta. Teo ihany koa ny ezaka rehetra nataon’ny federasionina. Nanao ny tokony hatao rehetra tamin’ny fikarakarana ny federasionina ary efa vita hatramin’ny visa an’i Mirantsoa sy ny trano hivantanany, saingy teo amin’ny tapakila no olana. Nanao antso avo ny federasionina, saingy tsy nahita vahaolana hatramin’ny talata lasa teo. Ny “accréditation” anefa ny alarobia no tokony hovitaina, raha ny fanazavany hatrany. Niaraha-nahalala ihany koa ny zava-nisy teto amin’ny firenena, ka tsy hifanomezan-tsiny, hoy hatrany ity filohan’ny FKM ity. Notsindriny anefa fa niaraka nitady vahaolana taminy ary teo hatrany ny minisitry ny Tanora sy ny fanatanjahantena, Rasambany Alain Désiré, izay notolorany fisaorana. Nomarihiny ihany koa fa tsy Razafindrakoto Mirantsoa irery no mpanao karateka tratran’ny tsy fahafahana nandeha tany ivelany toy izao. Misy atleta roa hafa izay tokony ho niatrika fifanintsanana ho an’ ny fiadiana ny tompondaka maneran-tany tany Paris, ny 15 hatramin’ny 17 oktobra lasa teo ihany koa, no tavela teto Madagasikara noho ny fahataran’ny fivoahan’ny “visa” an’izy ireo, araka ny fanazavany. “Tsy indray mandeha no manta vary ka handevin-tsotrobe”, hoy ity filohan’ny federasionina ity, namarana ny teniny.
Mi.Raz
French