Voatazon’i Madagasikara ny anaram-boninahitraho an’ny sokajy lehilahy sy vehivavy, taranja basikety lalaovin’olon-telo, teo amin’ny fiadiana ny tompondakan’i Afrika. Fifaninanana natao teto Madagasikara, nifarana omaly, teny amin’ny Lapan’ny Fanatanjahantena Mahamasina. Fitaintainana hatramin’ny farany ny lalao famaranana.
Isa ety dia ety hatrany ny teny amin’ny solaitrabe, na ny sokajy lehilahy na ny vehivavy. Teo amin’ny sokajy vehivavy, lavon-dry Christiane, Sarobidy, Sambatra ary i Sydonie, tamin’ ny isa 17 no 16 ny ekipa egyptiana. Ho an’ny sokajy lehilahy kosa, isa 21 no ho 20 no nisarahan’ny roa tonta. Efa tany amin’ny segondra farany avy amin’i Arnol no nahazoan’ny Ankoay ny amboara.
Tsiahivina fa nialohavan’ny lalao manasa-dalana nampitaintaina ireo famaranana ireo. Anisan’izany ny fifanandrinan’ny Ankoay, vehivavy, sy ny ekipan’i Kenya. Ady mafy hatrany am-piandohan’ny lalao ny teo amin’ny roa tonta, nisy fotoana tena efa nilaozan’i Kenya isa 6 ny ekipa malagasy, saingy nanezaka mafy ka sahala 20 no ho 20 ny isa teny amin’ny solaitrabe. Ny baolina nampidirin’i Sambatra tamin’ny minitra farany no nahazoan’ny Malagasy ny tapakilan’ny famaranana ka isa 21 no ho 20 izany no nisarahan’ny roa tonta.
Lalao mendrika
Teo amin’ny fiadian-toerana fahatelo kosa, azon’i Kenya ny fandresena nanoloana an’i Rwanda, ho an’ny sokajy vehivavy, ka isa 14 no ho 11 no nisarahan’ny roa tonta. Ho an’ny sokajy lehilahy, nahazo ny laharana fahatelo i Rwanda , nanoloana an’i Algerie, tamin’ny alalan’ny isa 21 no ho 13. Antoka iray nampahomby ny ekipa malagasy ny fanohanan’ny mpijery izay tonga maro teny an-toerana, notoloran’ny Ankoay fisaorana manokana. Teo amin’ny lafiny fandraisan’i Madagasikara ity fifaninanana ity, nidera ny fahaiza-manao teo amin’ny lafiny fikarakarana ireo firenena tonga nandray anjara. Nampanantena ny Malagasy mpilalao, i Arnol, fa manana vintana hanao lalao Olympika ny ekipa malagasy.
Marihina fa voahosotra ho mpilalao mendrika teo amin’ny sokajy vehivavy, i Jaofera Minoharisoa Christiane. Tafiditra anatin’ny” top 3 “ihany koa i Alia (Egypte) sy i Krisitine (Kenya). Teo amin’ny sokajy lehilahy, mpilalao mendrika Randriamampionona Elly. Tafiditra anatin’ny “Top 3” kosa i Rafaat (Egypte) sy i Justine (Rwanda).
Mi.Raz
Mpilalao mendrika
Vehivavy : Jaofera Minaoharisoa Christiane
Lehilahy : Randriamampionona Elly
Vokatra famaranana
Lehilahy : Madagasikara 21-20 Egypte
Vehivavy : Madagasikara 17-16 Egypte
Laharana fahatelo
Lehilahy : Rwanda 21-13 Algerie Laharana fahatelo
Vehivavy : Kenya 14-11 Rwanda
French