Tontosa ny sabotsy 20 desambra teo, teny amin’ny Kianja mitafon’i Mahamasina, ny fiadiana ny tompondakan’i Madagasikara, taranja Pancrace MMA, taom-pikatrohana 2025. Katrokady 40 no nitranga, nandritra izany. Niakatra ny lentan’ny mpikatroka nandritra ity fifaninanam-pirenena teo amin’ny taranja Pancrace MMA, ity. Tena nahitana taratra izany ny teo amin’ny sokajy taninketsa, raha ny nambaran’ny filohan’ny CMPS (Commission malagasy de Pancrace et submission), ny kolonely Zafindranaivo Zely. « Nihoatra noho izay nampoiziko ny vokatra », raha ny nambarany. Anisan’ny tena nisongadina sy nandrasan’ny maro ny fifandonana teo amin’i Tomy, avy amin’ny klioba Tsunami, sy i Poun, avy amin’ny klioba Taekwondo school, tao amin’ny sokajy A. Voahosotra ho tompondaka i Tomy, rehefa nanao fahadisoana tamin’ny tsy fanarahana fitsipika i Poun. Natasahatry ny mpitsara ny ady teo amin’izy roa lahy ireo, noho izany. Tsiahivina, mpiangaly taranja Jiu-jitsu ihany koa i Tomy, raha toa ka mpilalao baolina lavalava i Poun.
Nambaran’ny filohan’ny CMPS fa tapitra amin’io taona 2026 io ny fitantanany ity taranja ity. Nanao antso izy ho an’izay tena tia ny taranja Pancrace mba hitantana indray ny kaomisionina. Notsindriny fa mbola mianto-tena ny CMPS, hatreto, ka izay manam-piniavana ny hampandroso sy hampiroborobo ity taranja ity no hampirisihany handray ny fitantanana.
Mi.Raz
French