Ho fantatra, anio, ny ekipa nasionaly roa hiatrika ny lalao famaranan’ny “Can 2025”, izay tanterahina any Maroc. Hiditra an-tsehatra voalohany i Sénégal sy i Egypte. Manaraka azy ireo avy eo i Maroc sy i Nigeria.
Hafana ny lalao anio! Hotanterahina any Maroc ny manasa-dalan’ ny fiadiana ny ho tompondakan’i Afrika, taranja baolina kitra, “Can 2025”. Hanokatra izany ny fifanandrinan’ny Les Pharaons Egypte sy ny Lion de la Teranga Sénégal. Lalao hatao ao amin’ny Kianja Grand stade de Tanger. Tsiahivina fa efa tany amin’ny taona 2022 no nifandona farany ny ekipa nasionalin’i Egypte sy ny liona senegaley. Ry zareo Senegaley no nandresy tamin’ny isa 1 no ho 0, tamin’izany fotoana izany. Tsara ny mampahatsiahy fa ireto ekipa roa ireto izay efa niady ny famaranan’ny “Can” ny taona 2022. Ny liona hatrany no nibata ny amboara, rehefa lavo tany amin’ny fandakana “tirs au but” ny egyptianina.
Hanala vela
Fotoana iray hahafahan-dry Salah, kapitenin’ny Pharaons, hanala vela, araka izany, ny anio, ka azo lazaina fa hiady ny fihaonan’ny roa tonta. Etsy ankilany, ry Sadio Mané sy Nicolas Jackson, kintan’ny baolina kitra senegaley kosa hikendry ny handrombaka indray ny amboara rehefa nalaina teo am-pelantanany izany, ny taona 2024. Ampahafantarina fa ny mpilalao egyptianina no nanintsana an’i Côte d’Ivoire, tompondaka farany, tamin’ny isa 3 no ho 2, teo amin’ny dingan’ny ampahefa-dalana. Tafavoaka teo anatrehan’i Mali, 1 no ho 0, kosa ny senegaley.
Ankoatra izay, hiakatra kianja, anio, koa ny ekipa mpampiantrano, Lion de l’Atlas Maroc. Hifandona amin’ny Super Eagles Nigeria ry zareo amin’izany. Sambany eo amin’ ny tantara, hifandona amin’i Maroc anatin’ny Can, i Nigeria. Ny alahady 18 janoary ho avy izao no hanaovana ny lalao famaranana.
Fitia Randria
French