Miforona any amin’ny ranomasimbe Indianina ilay rivodoza Dudzai. Omaly, mbola any amin’ny 3 100 km atsinanan’ny morontsirak’I Madagasikara no nisy azy. Nilaza ny mpamantatra ny toetry ny andro etsy Ampandrianomby fa tsy hisy fiantraikany amin’ny toetry ny andro eto Madagasikara ity rivodoza ity ao anatin’ny herinandro. Arahi-maso hatrany nefa ny fivoarany any amin’ny faramparan’ny herinandro any.
Mahakasika ny toetry ny andro ankapobeny kosa, hiverina ny orana tandrifin-drahona saika manerana ny Nosy, rehefa somary niato kely izany nandritra ny roa herinandro. Mila miomana amin’izany ireo tsy maintsy hivoaka ny trano. Voakasik’izany ny any Sambirano, Sofia, Boeny, Melaky, Bongolava ary ny any Fitovinany hatrany Taolagnaro.
Ny any afovoany andrefana sy atsimo andrefana ihany no ho maina ny andro. Manodidina ny 13 hatramin’ny 26°C kosa ny maripana amin’ny afovoantany. Tafakatra any amin’ny 35°C ny ambony indrindra, any amin’ny faritra Atsimo Andrefana sy Betsiboka.
Tatiana A
French