“Vakojazzana”. Io ilay nampisaloran’ny Solomiral ny mozika lalaoviny. Ny taona 1975, 50 taona lasa izay no nanombohan’ny tantara ka tsy havelan-dry Hajazz mirahalahy avy handalo fotsiny izany, fa homarihina amina seho lehibe iray. Hotontosaina ny 18 janoary izao ny fanokafana izany jobily volamenan’ny tarika Solomiral izany. Hatao ao amin’ny Havoria Anosy ny seho, manomboka amin’ny 3 ora tolakandro. Hanasa ireo namany niara-dalana nandritra ny taona maro tao anatin’ ny mozika ry Solomiral, mandritra izany. Mazava loatra fa eo ny Olombelo Ricky, satria mpitendry nanaraka azy nandritra ny taona maro ireo mandrafitra ny Solomiral, ary mbola misy miara-dalana aminy hatramin’izao. Eo koa i Rija Ramanantoanina sy i Nini Kiaka ary Imiangaly, izay vavitokan’ny seho amin’ity.
Karazana anjoria an-kira, hitety izay 50 taona nolalovana izay no homanin’ny Solomiral amin’io seho io. Hanehoan’izy ireo ihany koa ilay fitohizan’ny mozika, rehefa miampita ny fanilo amin’ny taranaka. Raha toa ka i Bruno Rasolomahatratra, lahimatoa amin-dry zalahy mpiray tampo no nanangana ny tarika tamin’ ny taona 1975, nanara-dia azy tao ry Hajazz, Mendrika, Fanaiky, Ony, nohatevenin’ireo namana mpitendry toa an-dry Seta, Rivokely, Tahinavibe ary i Andrikely. Amin’izao fotoana, efa miaraka amin’ny tarika ireo solofo dimbin’ny ala, ahitana an’i Ny Ray Fanaiky, izay zanak’i Fanaiky ihany.
Zo ny Aina
French