“Tranobe” na “Lonaky” iraisan’ireo foko rehetra anatin’ny distrika 5 mandrafitra ny faritra Atsimo Atsinanana. Anisan’ ireo hetaheta nampitain’ireo Ampanjaka telo tonta ao Farafangana, solontenan’ireo raiamandreny ara-drazana ao amin’ny Faritra, tamin’ny tale jeneralin’ny Kolontsaina sady mpanakanto Théo Rakotovao io. Nandritra ny fitsidihana izay notontosainy tany an-toerana, ny faran’ny herinandro teo, izany, ka nifampidinihany tamin’ireo raiamandreny ny mahakasika ny fanomezan-danja ny kolontsaina any an-toerana. Nangatahin’ireo Ampanjaka ihany koa ny hananganana tranombakoka ao amin’ny Faritra, hampahafantarana ny taranaka aty aoriana ny fomba amam-panao sy ny soatoavina ara-drazana. Samy nahatsapa ny maha zava-dehibe an’izany ny roa tonta ka hojerena ny fanatanterahana azy.
Nihaona ihany koa tamin’ireo mpanakanto namany avy ao amin’ny Faritra ny tale jeneralin’ny Kolontsaina. Anisan’ny hetahetan’ireo mpanakanto vory tao Farafangana, ny hananan’ny Faritra ivontoeram-pampianarana mozika sy zavamaneno, hahatongavan’izy ireo amin’ny maha matihanina. Nohamafisin’i Théo Rakotovao kosa ny maha zava-dehibe ny fivondronan’ireo mpanakanto mba hahafahan’izy ireo misongadina sy mampidi-bola amin’ny talentany. Nampahafantatra ihany koa ireo fanavaozana rehetra natao sy andalam-panatontosana, ho fanatsarana ny sehatra, ny tale jeneraly. Tsy nohadinoiny ny fanentanana amin’ny hitrandrahana ny zavakanto manome hasina ny kolontsaina sy ny soatoavina malagasy. Hitohy any Vangaindrano ity tsidika ataon’ny delagasionin’ny minisiteran’ny Serasera sy ny kolontsaina ity.
Zo ny Aina
French