Mikasa ny handray anjara amin’ny fifanintsanana iraisam-pirenena maro ny Federasionina malagasin’ny taranja tolona, (FML), amin’ity taom-pilalaovana vaovao ity. Anisan’izany ny fiadiana ny ho tompondaka maneran-tany ho an’ny sokajy zandriny, izay hatao ny volana aogositra ho avy izao. Eo ihany koa ny lalao Olaimpika ho an’ny tanora, U17, izay hotontosaina any Sénégal, ny volana novambra ho avy io. Ho fiatrehana izany, misy ny fifaninanam-pirenena ho an’ny sokajy seniors sy junior, izay hotontosaina ny 14 sy ny 15 febroary ho avy io. Ireo izay mendrika amin’izany no hiatrika fampivondronana, ary hifantenan’ireo teknisianina izay hita fa misongadina, hiaro ny voninahi-pirenena. Marihina fa ity fifanintsanana nasionaly ity dia tafiditra anatin’ny taom-pilalaovana teo aloha 2025. Noho ny zava-misy teto amin’ny firenena no nahatonga ny fiadiana ny ho tompondakan’i Madagasikara nahemotra ho amin’ny volana febroary izao.
Fitia Randria
French