Ho hampiharana eto Madagasikara ny fambolem-bary an-tanety hampiasana fitaovana vaventy. Faritra telo ny hanaovana ny tetikasa andrana, ary hitarina any an-kafa izany avy eo.
Vita sonia, ny sabotsy 14 febroary teo, ny fifanarahana fiaraha-miasa eo amin’ny minisiteran’ny Fambolena sy ny fiompiana (Minae) sy ny orinasa Com’On Holding avy any Côte d’Ivoire. Tsotra ny nahatonga izao fiaraha-miasa izao. Nahavita fikarohana amin’ny fampiasana ny fitaovana mekanika amin’ny fambolem-bary an-tanety, efa 10 taona lasa, ny teknisiana malagasy, Raharinaivo Gislain. Nentiny tany Côte d’Ivoire ny traikefany, niara-niasa tamin’ny orinasa Com’On Holding, ka nahomby ny tetikasa natao. Nahatratra 6t/ha ny voka-bary azo, raha manodidina ny 2t/ha ny salam-bokatra any Côte d’Ivoire. Nambaran-dRaharinaivo Gislain fa tanjona ny hahazoana 10t/ha. Hoentiny sy ny orinasa Com’On Holding eto Madagasikara io traikefa io, hanitarana ny velarantany voajary sady hiarovana ny sahandriaka ihany koa.
Nambaran’ny minisitry ny Fambolena sy ny fiompiana (Minae), Rasatarimanana José Nirina, fa mifanandrify tanteraka amin’ny Politika ankapoben’ny fanjakana (PGE) ity tetikasa ity. Endriky ny fiaraha-miasan’ny fanjakana amin’ny tsy miankina na eto an-toerana na avy ny any ivelany. Ary indrindra, hitsinjovana ny tantsaha. Tanterahina any amin’ny faritra Alaotra Mangoro, Atsinanana ary Bongolava ny tetikasa andrana,
amin’ny velarantany 150 000 ha havadika ho tanimbary an-tanety vaovao. Ampiasaina ny fitaovana mekanika, manomboka any amin’ny fiasana ny tany, ny fanetsana, ny fihavana, hatrany amin’ny fijinjana. Nilaza Raharinaivo Gislain, fa hitombo 25% ny vokatra azo, satria mihena ny vary very.
Miara-miasa amin’ny teknisiana malagasy, avy ao amin’ny Fofifa, ampiasana ny masomboly nankatoavin’ny Africa Rice, sns.
Notsorin’ny filoha tale jeneraly (PDG) ny Com’On Holding, Eric Kouadio-Tiacoh, fa zava-dehibe ho azy ireo izao atao eto Madagasikara izao. Satria hitombo ny asa, hisitraka tombontsoa ny tantsaha malagasy mpamokatra, ary hitondra fampandrosoana ho an’ny firenena.
Njaka Andriantefiarinesy
French