Nihaona tamin’ny Mediatioran’ny Repoblika ny ambasadaoron’i Alemaina, omaly, teny Isoraka. Nivoitra, nandritra izany, ny fiaraha-miasa hanamafisana ny demokrasia eto Madagasikara.
Fiaraha-miasa amin’ny fitondrana tsara tantana, fitandroana zon’olombelona, fampandrosoana maharitra… Ireo no fototry ny dinika nihaonan’ny ambasadaoron’ny Repoblika Federalin’i Alemaina eto Madagasikara, i Oliver Knoerich, tamin’ny Mpiahy an-drariny ny vahoaka na ny Mediatioran’ny Repoblika, ny Pr Andrianaivotseheno Ravaka, teny Isoraka, omaly. Nampahafantarin’ny Mediatiora, tamin’ izany, ny andraikitry ny mpiahy an-drariny ny vahoaka, indrindra ny anjara toerany amin’ny fanamafisana ny fitondrana tsara tantana sy ny fiarovana ny zon’ny olom-pirenena ary ny fametrahana fanjakana tan-dalàna. Fantatra amin’ny fanohanana ny fampiroboroboana ny demokarsia sy ny fanajana ny zo fototra i Alemaina, heverina ho mpiara-miombon’antoka manana ny toerany amin’ny fanohanana ny vinan’ny Mediatioran’ny Repoblika eto Madagasikara.
Voaresaka koa ny fanorenana fiaraha-miasa maharitra, mifanaraka amin’ireo laharam-pahamehana stratejika, taona 2026-2032. Eo ny fitsinjaram-pahefana ho fototry ny fampandrosoana amin’ny fampandraisana anjara ny vahoaka ifotony. Vinan’ny Mediatiora rahateo izay amin’ny fikendrena izay hanatsarana ny fahazoan’ny olom-pirenena miditra amin’ny tolotry ny fanjakana sy mampiroborobo ny fitantanana mivelatra. Eo koa ny fiarovana ny tontolo iainana. Zava-dehibe ny fiantohana ny zon’ny tsirairay hiaina ao anatin’ny tontolo madio sy maharitra, indrindra manoloana ny fanamby ny amin’izany eto Madagasikara.
Na tsy nisy fifanarahana ofisialy aza, hita soritra ny endriky ny mety ho fivoaran’ny fiaraha-miasa. Liana amin’ny andraikitry ny Mpiahy an-drariny ny vahiny. Midika ho finiavana iombonana hanamafy ny rafitra demokratika sy hanohana ireo fanavaozana ataon’ny firenena izany?
R. Nd.
French