Notontosaina, omaly, teny amin’ny Lapan’ny Antenimierampirenena eny Tsimbazaza, ny fivoriamben’ny Parlemanta rezionalin’ny tanora aty amin’ny ranomasimbe Indianina na ny «Parlement régional des jeunes de l’indianocéanie» (PRJIO). Nankatoavina, nandritra izany, ny tolo-pehin-kevitra roa izay novolavolain’
izy ireo mahakasika ny fiarovana ny fitaterana an-dranomasina, ny fitantanam-panjakana sy ny toekarena manga ary ny fanorenana hoavy mamiratra ho an’ny tanora. Notsindrin’ny Sekretera jeneralin’ny Vaomieran’ny ranomasimbe Indianina, Dr Norbert Ibrahim Richard, nandritra ity fotoana ity ny fahalalahana maneho hevitra sy ny fahazoana vaovao marim-pototra ho an’ny tanora, ny fihainoana ny hetahetan’izy ireo sy ny soso-kevitra arosony. Nanamarika kosa ny masoivohon’i Frantsa nisolo tena an’i La Réunion, miasa sy monina eto Madagasikara, Arnaud Guillois, fa natao hanamafisana ny fifandraisana sy hampifanakaiky kokoa ireo firenena mpikambana ao amin’ny faritry ny ranomasimbe Indianina ity Parlemanta rejionalin’ny tanora ity.
Nilaza ny mpitondra tenin’ireo tanora fa hitondra ny feon’ny tanora amin’ny ambaratongam-pahefana izy ireo mba hanohana azy ireo hananana hoavy mamiratra.
Marihina fa ivondronan’ireo firenena enina aty amin’ny ranomasimbe Indianina ny Parlemanta rezionalin’ny tanora. Ny volana avrily 2025 no nananganana azy.
Andry F.
French