FANTINA sy FINTINA

Voatendry ho ambasadaoron’i Madagasikara any Rosia, Andriamanjato Ny Hasina, araka ny tapaky ny filankevitry ny minisitra, afakomaly, teny Iavoloha. Ambasadaoro any Alemana Razafimbelo Alain Mana­jary ary masoivohon’i Madagasikara eo anivon’ny Fi­renena mikambana (ONU), any New York, Rahajarizafy Lanto.
Tsy ho voavahan’ny fitondram-panjakana ao anatin’ny valo volana ny olana efa tao anatin’ny 16 taona, araka ny nambaran’ny lehibe’ny Faritra Ana­lamanga, Raharinirina Clémence. Na izany aza, nanteriny fa efa misy ireo ezaka tsy maintsy natao hanamaivanana izany. « Efa nihena ho 30 minitra ny fahatapahan-jiro raha naharitra ora enina izany taloha », hoy izy.
Nahemotra amin’ny fotoana manaraka sy naverina eo anivon’ny asam-baomiera ireo volavolan-dalàna miisa efatra, tokony ho laniana sy ho dinihin’ireo depiote, tamin’ity herinandro ity. Anisan’izany ny momba ny fahafahan’ny daholobe misitraka sy mahazo vaovao, ny fanondranana olona antsokosoko ary ny fandikan-dalàna amin’ny fananan-tany.
Nijoro ny birao vaovao hitantana ny antoko MMM ao amin’ny distrikan’i Toamasina I. Voafidy hitarika izany rafitra vaovao izany i Tombo Gemma Valery Gaël. Hisahana ny fiandraiketana sy ny fitarihana ny tanora eo anivon’ity antoko ity, any an-toerana, kosa i Be Franck Eliot.