Nandray anjara tamin’ny hetsika iraisam-pirenena amin’ny fahasalamana tao Afrika i Madagasikara, ny herinandro teo. Notarihin’ny minisitry ny Fahasalamam-bahoaka, Dr. Managna Monira, ny delegasionina.
Nisy ny fivoriana stratejika momba ny fahaleovantena sy ny fiarovana ara-pahasalamana aty amin’ ny kaontinanta Afrika, nandritra ny fihaonana “Africa Health ExCon 2026”.
Manoloana ny fanamby ara-pahasalamana sy ny areti-mifindra ankehitriny, miditra amin’ny dingana lehibe i Afrika ary ao anatin’izany i Madagasikara.
Ho an’i Madagasikara manokana, misy fahafahana stratejika lehibe ny amin’ny nanaovana haitaky hametraka paikady lavitr’ezaka amin’ny fijerena ny rafi-pamatsiam-bola vaovao ho an’ny fahasalamam-bahoaka. Eo koa ny fampiharana ny politikam-panavaozana ara-pahasalamana nasionaly amin’ny fenitra isam-paritra eo anivon’ny faritr’i Afrika. Manampy izany
ny fanamafisana ny faharetan’ny rojo famatsiana (supply chain). Akoatra ireo, ny fampidirana ny fanavaozana ara-teknolojia vaovao afaka miaro ny vahoaka malagasy amin’ny krizy ara-pahasalamana sy ny fiantraikan’ny fiovan’ny toetr’andro.
Tsy ho fandaniam-bolam-panjakana ny fahasalamana fa fampiasam-bola stratejika ho an’ny fahaleovantena, ny faharetana ary ny fampandrosoana maharitra ho an’i Madagasikara.
Hevi-dehibe nifanakalozana tao anatin’ny fihaonana ny momba ny fanamafisana ny rafi-pahasalamana amin’ny alalan’ny Drafitrasa voalamina tsara sy ny tondrozotra fampisehoana azo refesina, araka ny fomba fiasa “Fahasalamana Tokana” (One Health). Mampifandray ny fahasalaman’ny olombelona, ny biby ary ny tontolo iainana izany.
Nodinihina koa ny fampifanarahana ny lalàna momba ny fanafody sy ny fandaminana ny tsena isam-paritra amin’ny alalan’ny Rafitra afrikanina fividianana fanafody (African Group Purchasing Mechanism). Tanjona ny hiantohana ny fidiran’ny firenena rehetra amin’ny fitaovana famantarana aretina, vaksiny, fanafody ary vokatra ara-pahasalamana tena ilaina.
Tatiana A
French