«Tokony ho sahy hijoro hatrany isika hampiseho ny hambom-pom-pirenena. Mila sahy mijoro sy maneho fa manana tanjona iraisina isika ho mariky ny fitiavan-tanindrazana. Nahafoy ny ainy ireo maherifo noho ny fitiavan-tanindrazana», hoy ny Praiminisitra (PM) lehiben’ny governemanta, Rajaonarison Mamitiana, nandritra ny hetsi-pahatsiarovana ny faha-78 taona nitifirana ireo maherifo teny amin’ny sahan’Ampitifirana Ankatso, omaly. Hetsi-pahatsiarovana ho an’ireo niady ho fahafahan’i Madagasikara teo ambany vahoan’ireo mpanjanaka dia ny Lietnà Randriamaromanana Albert, Rakotondrabe Samuel, Ratsizafy Samüel, LEZOMA ary BEKAMISY. Nohamafisin’ ny PM fa mitaky fanovana toe-tsaina avy amintsika Malagasy mba tsy ho very maina ny ra nalatsak’ireo maherifo. Nanaitra ny hambom-pon’ny Malagasy rehetra ka nametra-panontaniana hoe mbola misy Malagasy sahy ho faty ho an’ny fitiavan-tanindrazana ve ankehitriny ? Notsindriany manokana fa maherifon’ny firenena ny Filoha ankehitriny satria sahy nijoro nanohitra ny jadona ary niantso ny rehetra hanohana azy mba ho fanavaozana tokoa an’i Madagasikara. «Miantso ny rehetra aho. Jereo i Madagasikara. Ny kolikoly no tena fahavalom-pirenena. Malagasy manao tantireraka ny ankamaroan’ny Malagasy sasany amin’izao», hoy izy. Nanamafy ny minisitry ny Foloalindahy, ny Jly Razafitombo Maminirina Ely, fa mendrika hotsaroana tokoan izao fotoana izao satria maneho ny fitiavan-tanindrazana sy ny fahafoizan-tenan’ireo maherifo izay nandray anjara lehibe tamin’ny nahazoan’i Madagasikara ny fahafahany.
Jean Claude
French