Paikady hampivoarana sy hampiroboroboana ny indostra malagasy ny « Programme For Country Partnership » 2026-2030. Fandaharanasa iarahan’ny fanjakana sy ny Onudi manatanteraka. Omena vahana ny hanodinana ny akora fototra eto an-toerana, hiantohana ny famoronan’asa mendrika ho an’ny tanora.
Manana loharanon-karena tsy voatrandraka i Madagasikara, izay soa fanararaotra ho fampiroboroboana ny indostria sy hamoronana sanda fanampiny eo amin’ny toekarena. Nivoitra izany nandritra ny fanolorana tamin’ny fomba ofisialy ny « Programme de partenariat pays » (PCP) 2026-2030, teny amin’ny CCI Ivato, ny alakamisy teo. Rafitra hanohanana sy hitarihana ny fanovana ny indostria eto Madagasikatra. Fandaharanasa tarihin’ny minisiteran’ny Indostria sy ny fampivelarana ny sehatra tsy miankina (MIDSP) sy ny fikambanan’ny Firenena mikambana misahana ny fampandrosoana ny indostria (Onudi).
Tombony ara-toekarena sy andry hampiroboroboana ny indostria eto Madagasikara ireo vokatra miisa 239 azo avy amin’ny seha-pihariana 23. Tanjon’ny PCP ny hanamafy ny famokarana sy ny famoronana asa mendrika. Kendrena ihany koa ny hanohana ny famokarana manoloana ny fitomboan’ny mponina sy
ny fiovaovan’ny toetr’andro.
« Dingana lehibe amin’ny fanovana ara-toekaren’i Madagasikara ity fandaharanasa ity. Mikendry ny hanangana indostria maoderina, maitso ary afaka mifaninana », hoy ny filoha, ny kolonely Randrianirina Michaël, tamin’ny lahateniny.
Sehatra
Hifantoka amin’ireo tetikasa laharam-pahamehana amin’ireo sehatra stratejika sy ireo faritra manana tanjaka ara-indostria ny fandaharanasa. Tanjona ny hanafoana ireo sakana ho an’ny fampivoarana ny seha-pihariana sy hampiroborobo ny fampiasam-bolan’ny fanjakana sy ny sehatra tsy miankina. Kendrena ao anatin’ny PCP ny hampakatra 70% ny tahan’ny fampidirana asa, raha 38% izany amin’izao. Hamafisina koa ny fanofanana. Tanjona ny hampisitraka izany ho an’ ny olona 100 000, hatramin’ny taona 2030, ka ho vehivavy avokoa ny 40% fara fahakeliny amin’izany. Nohamafisin’ ny Filoham-panjakana fa hametraka paikady indostrialy sy mampifandray ireo minisitera samihafa manomboka amin’ny famokarana hatrany amin’ny fidirana amin’ny tsena ny PCP. Nilaza ny minisitra Raharimanjato Ny Riana Nampoina, fa « vokatry ny fiaraha-miasa eo amin’ny governemanta malagasy sy ny Onudi ny PCP. Kendrena amin’izany ny hampiroborobo ny indostria, hanamafy ny sanda ifandraisana ary hanohana ny sehatra tsy miankina. Hisarihana fampiasam-bola sy hamorona asa, indrindra ho an’ny tanora sy ny vehivavy ».
Henintsoa
French