Nihena ho 15 000 hatramin’ny 20 000 taonina sisa ny vokatra kafe eto Madagasikara, raha nahatratra 80 000 taonina izany tany amin’ny taona 90, izay anisan’ny nanondrana tany ivelany isika. Manoloana izany, misy ny fiaraha-miasan’ny Foibem-pikarohana momba ny masomboly, ny Fofifa sy ny SOC, amin’ ny ivontoerana, ny Robens Group, mpamokatra sady mpampitombo masomboly
« In Vitro », toy ny katsaka, ny vary, ny voly avotra ary indrindra ny kafe.
Fiaraha-miasa eo ambany fiahian’ny minisiteran’ny Fambolena sy ny fahaleovantena ara-tsakafo (MiASA). Velaran-tany 100 000 ha no kendrena hamerenana ny voly kafe, ka tena ifantohana ny any amin’ ny faritra atsinanan’ny Nosy sy ny eto afovoantany. Azo heverina ny ahafahana indray manondrana kafe any ivelany, toy ny tany aloha.
Laboratoara
Eny Ambatolampy Tsimahafotsy ny toerana misy ny Robens Group, ahitana ny famokarana zanakazo amin’ ny alalan’ny « In Vitro » sy ny laboratoaram-pikarohana. Tanjona ny hamokarana masomboly tsara kalitao, ampy ary mifanaraka amin’ny toe-tany eto Madagasikara. Tafiditra ao anatin’izany ny fahazoan’ny tantsaha masomboly mahomby mifanaraka amin’ny filany, hampitomboana ny vokatra ara-pambolena. Hihatsara ny fahafaha-mamokatra sady hitombo ny fidiram-bola, hitondra fampandrosoana.
Njaka A.
French