Hitondra anjara biriky amin’ny fisarihana fiaraha-miasa sy fampiasam-bola bebe kokoa amin’ireo sehatra laharam-pahamehana eto Madagasikara ireo fifanakalozan-kevitra sy fiaraha-miombon’antoka hotanterahina. Antenaina hitondra tombontsoa ho an’ny vahoaka izany.
Hanamafisana ny fiaraha-miasa amin’ireo firenena mpikambana ny fandraisana anjaran’i Madagasikara. Tarihin’ny filohan’ny Fanavaozana ny Repoblika, ny kolonely Randrianirina Michaël, ny delegasiona amin’ny Fihaonambe faha-81 an’ny Firenena mikambana (ONU) any New York, Etazonia. Io ny fampitam-baovaon’ny eo anivon’ny minisiteran’ny Raharaham-bahiny, Anosy, omaly. Eo koa ny fanamafisana ny fifandraisana ara-diplaomatika sy ny fampahafantarana sy fampiroboroboana ny laharam-pahamehan’i Madagasikara eo amin’ny sehatra iraisam-pirenena amin’izao. Hitondra anjara biriky amin’ny fisarihana fiaraha-miasa sy fampiasam-bola bebe kokoa amin’ireo sehatra laharam-pahamehana eto Madagasikara ireo fifanakalozan-kevitra sy fiaraha-miombon’antoka hotanterahina. Antenaina hitondra tombontsoa ho an’ny vahoaka amin’ny alalan’ny fampandrosoana ara-toekarena sy ny famoronana asa ary ny fanatsarana ny fari-piainana ny fandraisana anjaran’i Madagasikara amin’izao fivoriambe izao.
Tsiahivina fa efa tonga any an-toerana mialoha ny ampahany amin’ny delegasiona malagasy ho fanomanana ny fandraisan’i Madagasikara anjara amin’ny fihaonana avo lenta amin’izao Fivoriambe izao. Eo ny minisitry ny Raharaham-bahiny, i N’Diaye Alice, mitarika ny delegasiona. Miara-miasa aminy ny solontena maharitr’i Madagasikara eo anivon’ny ONU, ny ambasadaoron’i Madagasikara, Rahajarizafy Lanto. Manampy izany ny ambasadaoro any Washington, Rakotomalala Lantosoa, ary ireo mpikambana ao amin’ny ekipa diplaomatika sy teknika. Ny fahatongavan’izy ireo mialoha any an-toerana dia natao indrindra hanomanana ny fahatongavan’ny filohan’ny Fanavaozana ny Repoblikan’i Madagasikara, ary fandraisany anjara feno amin’ny asa sy ny dinika mandritra ny Fivorambe.
R. Nd.
French