Tafapetraka tamin’ny fomba ofisialy, omaly, ny Vovonana Tantana-Faritany Antananarivo sy ny faritra Analamanga. Notontosaina tetsy amin’ny efitrano malalaky ny Kaominina Antananarivo Renivohitra ny lanonana nanolorana tamin’ny fomba ofisialy ny taratasy manendry an-dRamatoa Raharivololoniaina Ninah ho mpandrindram-paritra Analamanga sy Ramatoa Randrianarisoa Riana Raymonde ho ambasadaoro eto amin’ny faritany Antananarivo.
Misokatra ho an’ny ankolafy sy hery rehetra ny Vovonana. Sehatra mampiray sy mampihaona ireo zoky manana traikefa, ireo tanora mpitarika, ireo olom-pirenena ary ireo hery velona maniry ny hahita fanavaozana tena izy eto Madagasikara. Manamafy ny fanohanany ny ezaka fanavaozana ataon’ny fitondrana amin’izao fotoana, tarihin’ny Filohan’ny Fanavaozana, ny kolonely Randrianirina Michaël, izy ireo. Nanamafy izany rahateo ny filoha nasionaly, Rakotoniaina Justin.
“Manao antso avo amin’ ireo ben’ny Tanàna na miankina na tsy miankina hiditra ao amin’ny firaisankinan’ny ben’ ny Tanànan’ny fanavaozana (FBF), satria miainga eny ifotony ny fampandrosoana ny firenena. Miantso ireo olom-pirenena tsara sitrapo sy entanin’ny fitiavana ny tanindrazana koa hanatevina ny vovonana fa an’ny rehetra i Madagasikara”, hoy Randrianarisoa Riana Raymonde, Ambasadaoro eto amin’ny faritanin’ Antananarivo.
Taorian’iny fanomezam-pahefana ho an’ny mpandrindra ny faritra Analamanga sy ny ambasadaoron’ny Faritany Antananarivo iny, hitohy amin’ ny fametrahana ireo rantsamangaikan’ny faritra ao Vakinankaratra, Itasy ary Bongolava ny vovonana, araka ny nambaran’ny Ambasadaoro. Hitohy hatrany amin’ny distrika sy ny kaominina ary ny fokontany izany avy eo.
Claude Eric
French