Manana ny fiheverany ny fahafatesana ny Malagasy. Tsy itovizana ny hevitra ary samy manana ny fomba fijeriny ny tsirairay. Tsy toe-javatra mandalo fotsiny ihany koa izany fahafatesana izany, ho an’ny Malagasy fa misy dikany lehibe. Lovan-tsaina, finoana sa fomba fijery miovaova? Io ny fanontaniana mipetraka. Ho famaliana izany fanontaniana izany sy hahafahana mamoaka ireo hevitra samihafa, hisy ny loa-bary an-dasy hifanakalozan-kevitra, ny alarobia 4 novambra izao, eny amin’ny Efitrano Dox Tranom-bokim-pirenena Anosy, manomboka amin’ny 2 ora sy sasany tolakandro. Ny Famoloana Telozoro no mikarakara ny hetsika, ka zoky raiamandreny 3 no hifampizara fahalalana amin’io fotoana io. Anisan’izany, Randrianalidera Radoniriana Robin, mpitandrina eo anivon’ny FJKM. Eo ihany koa Zoky Tahina Hebrio,mpankasitraka fomba gasy miaraka amin’ny finoana Hebrio ary Randrianirina Nomenjanahary Herizo (Sakabe), mpandala fomba. Hisy ny fifanakalozan-kevitra, fizarana fahalalana sy traikefa, fomba fijery samihafa na mifameno, hahafahana manasongadina ny fomba malagasy mahakasika ny lohahevitra hoe ” Ny fiheverana ny fahafatesana amin’ny malagasy: Lovan-tsaina, finoana sa fomba fijery miovaova?”. Miara-dalana amin’ny mpikarakara, amin’ity hetsika ity, ny minisiteran’ny Serasera sy ny kolontsaina izay manome lanja ny haren-tsaina marolafy sy manome sehatra ny literatiora sy ny fomba amam-panaony.
Mi.Raz
French