Miisa 6 ny kaominina manodidina ny Faritra Arovana Ankarafantsika, distrika Marovoay sy Ambato Boeny. Anisan’ny manohana ny fiarovana azy ny fandaharanasa PADDI+, vatsian’ny Vondrona Eoropeana (UE) sy ny BMZ Alemana ara-bola. Fiaraha-miasa iarahana amin’ny minisiteran’ny Tontolo iainana sy ny fampandrosoana maharitra (Medd).
Tafiditra ao anatin’izany ny fampifandraisana ny fiarovana ny tontolo iainana sy ny fampandrosoana maharitra. Tanjona ny hitsinjovana ny velon-tenan’ny tantsaha, hanatsarany ny fidiram-bolany. Araka ireo, novatsiana fitaovam-pamokarana (angadinomby, sarkilezy, fiavana…) sy masomboly voafantina ny tantsaha monina manodidina ny Faritra Arovana.
Nisitraka izany ny kaominina Ankijabe, Marosakoa, Ankazomborona, Ambondromamy, Tsaramandroso ary Andranofasika.
Nahaverina ny masomboly
Mampiavaka manokana ity fanohanana ity ny rafitra fifampizarana ny masomboly. Antony, ahafahan’ny tsantsaha nahazo tohana, ka mamerina amin’ny ampahany ny vokatra azony ho zaraina amin’ny tantsaha hafa ihany koa. Misy tamin’izy ireo nahavita namerina masomboly mihoatra noho izay nomena azy tamin’ny taom-pambolena teo aloha.
Tanjona amin’ity tetikasa ity ny fametrahana famokarana maharitra, hanatsarana ny fari-piainan’ny mponina. Ary indrindra, hampihena ny tsindry mianjady amin’ny ala sy ny harena voajanahary any Ankarafantsika.
Njaka A.





