Raikitra ihany ny fanentanana ny mpifidy. Tsy voasakan’ny fepetran’ny minisiteran’ny Atitany amin’ny tsy fahazoana mamory vahoaka ankalamanjana sy ny fanakanana nataon’ny Emmo/Reg ny hetsika nataon’ny Tim.
“Tsy voasakana izany intsony isika. Adin’ny kanosa ireny fanakatsankanana ireny”, hoy ny filoha nasionalin’ny Tim, Ravalomanana, raha nihaona amin’ny vahoakan’i Manjakandriana, omaly. Vory lanona tao amin’ ny ankalamanjana iray any an-toerana izy ireo. Nambarany fa diso fahavalo ny Emmo/Reg nanakana azy teny an-dalana. “Aoka mba ho ny tsy fandriampahalemana sy ny fahantrana lalina no anehoanareo sakana tahaka izao”, araka ny nambarany.
Niompana amin’ny fanentanana ny mpifidy hisoratra anarana anaty lisi-pifidianana eny anivon’ny fokontany ny lahateny nifandimbiasana. “Zava-dehibe ny fisoratana anaty lisi-pifidianana, hahafahana mifidy sy mitory raha misy tsy fanarahan-dalàna amin’ny fifidianana”, hoy izy.
Nandeha an-tongotra 5km Ravalomanana
Tsiahivina fa voasakana ny fiara nitondra ity mpanorina ny Tim ity raha mbola tany amin’ny 5km mialoha ny hidirana ny tanàna. “Isika manana tongotra rehefa tsy avelany mandeha fiara… Mila mandroso hatramin’ny farany isika fa tsy mihemotra”, hoy ny filoha teo aloha Ravalomanana Marc, rehefa tafahoana tamin’ireo vahoaka.
Nikatso 30mn teo ny fifamoivoizana, nitohana ny fiara rehetra nivezivezy teny amin’ny lalam-pirenena faharoa, noho io tranga io. “Resaka hafa any tsy misy idiranay olon-tsotra mitondra fiara fa tokony avelanareo handeha izahay. Manana fotoana izahay matoa miainga vao maraina nefa sakanana tahaka izao”, hoy ireo mpitondra fiara.
Tsiahivina, nilatsaka ny herinandro teo ny fepetra avy amin’ny minisiteran’ny Atitany amin’ny fandrarana hetsika ankalamanjana. Tsy maintsy anaty efitrano avokoa izany, manomboka izao, araka ny fanambarana.
Synèse R.
French