“Manapa-kevitra izahay androany ary miantso ny mpikambana rehetra manerana ny Nosy amin’ny toromarika tokana fa hiroso amin’ny fifidianana ny RMDM.”
Io ny fanambaran’ny Rodoben’ny mpanohitra ho an’ny demokrasia eto Madagasikara (RMDM), novakin’ny filoha lefitra, ny pasitera Tsarahame Edouard, teny Bel’Air Ampandrana, afakomaly. Izany anefa tsy midika fa hanaiky ny fandikan-dalàna. Nambarany fa ilaina ny fifidianana madio, mangarahara, eken’ny rehetra.
Betsaka ny feo mandeha, maro ny zavatra mety miseho. Tsy mbola niresaka momba an’izany ry zareo, fa nanamafy ny foto-kevitra ijoroany: tsy mila Tetezamita ny RMDM, fa fifidianana madio, mangarahara, eken’ny rehetra. Lalàna no mamaritra an’izany. Ao ny lalàna mifehy ny mpikarakara fifidianana. Ao ny lalàna mifehy ireo fitaovana hoenti-manatanteraka fifidianana. Ao koa ireo mpanara-maso fifidianana. Hatao madio izany. Angatahan’ny RMDM ny hamoahan’ny governemanta ny datim-pifidianana mazava.
R. Nd.
French