Hihaona amin’ny solombavambahoaka, eny amin’ny antenimierampirenena Tsimbazaza, ny minisitra, hanao ny tatitry ny zava-bita sy ny zava-misy. Mahakasika ny lalana sy ny sosialim-bahoaka ary ny fitantanam-bola no tena hisongadina ao anatin’izany.
Hafampana! Hanomboka ny 24 hatramin’ny 31 mey, ny tatitry ny mpikambana eo anivon’ny governemanta, eny Tsimbazaza. Hanao tatitra tsirairay eo anoloan’ireo solombavambahoaka ny minisitra tsirairay avy. Betsaka ny tsikera sy tsy fahafaham-pon’ireo depiote ankoatra ny filazana na fitanisana ny zava-bitan’ny fitondrana. Anisan’ireny ny haratsian’ny ankamaroan’ny lalana sy ny lalam-pirenena (RN). Torak’izany ny ady amin’ny tsy fandriampahalemana. Ny naoty na fepetra noraisin’ny minisiteran’ny Atitany momba ny famerana ny famoriam-bahoaka ho anaty trano ihany. Anisan’ny teboka goavana ny momba ny fitsarana, niteraka resabe tato ho ato. Manampy ireo voalaza ny momba ny sosialim-bahoaka sy ny momba ny fitantanam-bola eto amin’ny firenena.
Ankoatra izany, anisan’ny hodinihin’ny Antenimierampirenena, amin’ny alatsinainy ho avy izao ny tolo-dalàna mifehy ny fampiasam-bola. Anisan’ny napetraka ho laharam-pahamehana amin’izao fotoam-pivoriana voalohany izao ny momba izany. Hodinihina ny 23 mey kosa ny tolo-dalàna 001/2023 « Autorisant la ratification de l’accord de prêt relatif au financement additionnel du Programme Africain de Financement de la Gestion des Risques de Catastrophes – ADRiFi”.
Synèse R.
French