Mivoy hatrany ny fampiharana araka ny tokony ho izy ny tena fitsinjaram-pahefana sy manome vahana ny eny ifotony. Nihaona sy nihaino ireo mpikambana eo anivon’ny antoko Malagasy miara-miainga tao amin’ny distrikan’i Betroka sy ny kaominina Isoanala, ny delegasiona notarihin’ny filoha nasionaly, Andrianainarivelo Hajo, tamin’izao fiandohan’ny herinandro izao. Nifanakalozana hevitra tamin’izany ny ahafahana manabe voho ny antoko sy ny hanamafisana ny fotokeviny, mifototra amin’ny fitsinjaram-pahefana tena izy. Nambaran’ny mpitarika ny antoko fa tsy hisy fampandrosoana vanona izany eto raha tsy apetraka sy mihatra araka ny tokony ho izy ny fitsinjaram-pahefana. Efa misy ny fampiharana izany hatramin’ny nijoroan’ity antoko ity. Tsy latsa-danja amin’izany ny fitsinjaram-pahefana entina hitantanana ny firenena, araka ny nambaran’Andrianainarivelo Hajo. “Ilaina ny fanatevenana ny fahaiza-manao eny ifotony. Manomboka amin’ny sefo fokontany izany ka omena ny andraikiny izy ireo ary arahina fampitaovana sy hoenti-manana mifanaraka aminy hisian’ny fampandrosoana”, hoy izy. Nifanakalozana amin’ireo mpikambana ny hampiroboroboana sy hanitarana hatrany ny ambaindain’ny antoko.
Latsaka an-katerena
Etsy andaniny, naneho ny hafaliany ireo mpikambana tamin’izao fihaonana amin’ny filoha nasionaly izao. “Porofon’ny fitiavana izao”, hoy izy ireo. Nitatitra ny olana isaky ny kaominina ireo mpikambana. Nifampizara amin’izy ireo ny zava-misy eto amin’ny firenena kosa ny mpitarika ary nampahatsiahy ny vina sy ny fotokevitry ny antoko. Nohenoina koa ireo manana hevitra sy fomba fijery hoentina manavotra ny taninjanaka efa latsaka an-katerena. Tsiahivina fa nanomboka tany Ihosy, Ihorombe izao hetsika ataon’ny MMM izao ary hitohy any amin’ny distrika hafa, any atsimo hatrany.
Synèse R.
French